SHBA publikon marrëveshjen trepalëshe me Izraelin dhe Libanin: Parashikohet çarmatimi i grupeve të armatosura dhe tërheqja graduale e IDF-së
Departamenti Amerikan i Shtetit ka publikuar tekstin e plotë të marrëveshjes kornizë të nënshkruar më 26 qershor në Uashington mes Shteteve të Bashkuara, Izraelit dhe Libanit, e cila synon t’i japë fund gjendjes së konfliktit dhe të vendosë themelet për një marrëdhënie të qëndrueshme fqinjësore mes dy vendeve.
Sipas dokumentit, marrëveshja bazohet në respektimin e sovranitetit të ndërsjellë dhe zgjidhjen e mosmarrëveshjeve përmes negociatave të drejtpërdrejta. Zbatimi i saj do të zhvillohet në mënyrë graduale dhe do të kushtëzohet nga hapa konkretë dhe të verifikueshëm në terren.
Një nga pikat kryesore të marrëveshjes është forcimi i rolit të Forcave të Armatosura Libaneze (LAF), të cilat do të marrin gradualisht kontrollin e sigurisë në zonat përkatëse, ndërsa Forcat e Mbrojtjes së Izraelit (IDF) do të tërhiqen progresivisht nga territori libanez.
Dokumenti parashikon gjithashtu vendosjen e monopolit shtetëror mbi përdorimin e forcës në Liban. Qeveria libaneze angazhohet për çarmatimin e të gjitha grupeve të armatosura jo-shtetërore dhe çmontimin e infrastrukturës së tyre ushtarake, duke e konsideruar çdo përdorim të forcës jashtë autoritetit shtetëror si të paligjshëm.
Në tekst theksohet se asnjë grup i armatosur, përfshirë Hezbollahun, nuk duhet të ushtrojë funksione ushtarake apo të sigurisë brenda Libanit. Nga ana tjetër, Izraeli deklaron se operacionet e tij kanë qenë përgjigje ndaj kërcënimeve nga aktorë jo-shtetërorë dhe rithekson se nuk ka pretendime territoriale ndaj Libanit, duke lënë të hapur mundësinë për tërheqje të mëtejshme nëse kërcënimet eliminohen.
Marrëveshja lidh gjithashtu stabilizimin e sigurisë me kthimin e civilëve në zonat e prekura dhe nisjen e projekteve të rindërtimit të financuara nga komuniteti ndërkombëtar.
Shtetet e Bashkuara angazhohen të mbështesin forcimin e ushtrisë libaneze dhe rimëkëmbjen ekonomike të vendit, me kusht që të ketë rezultate të verifikueshme dhe transparencë në zbatimin e reformave. Dokumenti parashikon gjithashtu ndalimin e çdo financimi për individë apo struktura të lidhura me grupe të armatosura jo-shtetërore.
Pas nënshkrimit të marrëveshjes, palët kanë nisur ngritjen e grupeve të përbashkëta të punës për hartimin e një marrëveshjeje gjithëpërfshirëse dhe afatgjatë për paqen dhe sigurinë. Bashkëpunimi do të përfshijë edhe çështje humanitare, si identifikimi dhe kthimi i trupave të personave të zhdukur, si dhe lirimi i të ndaluarve.
Dokumenti përfundon me një vlerësim për rolin ndërmjetësues të Shteteve të Bashkuara në arritjen e kësaj marrëveshjeje dhe në mbështetjen e procesit të normalizimit të marrëdhënieve mes Izraelit dhe Libanit.
