Shtetet e Bashkuara të Amerikës dhe vendet kryesore evropiane kanë rënë dakord të shtojnë presionin ndaj Rusisë, në përpjekje për të nxitur negociatat për përfundimin e luftës në Ukrainë. Vendimi u diskutua gjatë ditës së dytë të samitit të G7 në Francë, ku iu bashkua edhe presidenti ukrainas, Volodymyr Zelensky.

Sipas burimeve të qeverisë gjermane, liderët e vendeve të G7, përfshirë presidentin amerikan Donald Trump, vlerësuan se pozicioni i Ukrainës në fushën e betejës është përmirësuar ndjeshëm gjatë periudhës së fundit.

“Ata ranë dakord se mbështetja për Ukrainën duhet të rritet dhe se presioni ndaj Rusisë duhet të shtohet”, deklaruan burimet pas takimeve.

Sipas të njëjtave burime, vendet evropiane u paraqitën me një qëndrim të bashkërenduar, duke vlerësuar se situata në terren ka ndryshuar në favor të Kievit.

“Dinamika ka ndryshuar për Ukrainën. Ajo ndodhet tani në një pozicion force, ndërsa Rusia është nën presion”, theksuan burimet.

Gjatë samitit, kryeministri britanik Keir Starmer dhe homologu i tij kanadez Mark Carney njoftuan paketa të reja sanksionesh kundër Rusisë.

Kanadaja vendosi masa të reja ndaj 162 individëve, kompanive dhe anijeve të lidhura me aktivitetet ruse, ndërsa Britania e Madhe shpalli 70 sanksione të reja që synojnë flotën e fshehtë detare të Rusisë, zinxhirët e furnizimit të industrisë së mbrojtjes dhe rrjetet financiare që përdoren për të shmangur kufizimet ndërkombëtare.

Ndërkohë, përpjekjet diplomatike për t’i dhënë fund konfliktit kanë ngecur javët e fundit. Uashingtoni ka ndërmjetësuar mes Moskës dhe Kievit, por zhvillimet në Lindjen e Mesme dhe përqendrimi i administratës amerikane te kriza me Iranin kanë ngadalësuar procesin.

Në këtë situatë, Gjermania, Franca dhe Britania e Madhe po kërkojnë të marrin një rol më aktiv në negociatat e ardhshme, me synimin për të ringjallur përpjekjet diplomatike dhe për të afruar palët drejt një marrëveshjeje për armëpushim dhe paqe.