Detaje të reja kanë dalë në dritë mbi marrëveshjen paraprake mes Shteteve të Bashkuara dhe Iranit, e cila synon t’i japë fund konfliktit mes dy vendeve dhe të hapë rrugën për një marrëveshje përfundimtare brenda 60 ditëve.

Sipas CNN, që ka siguruar një kopje të memorandumit të mirëkuptimit nga një zyrtar amerikan, dokumenti përmban 14 pika dhe parashikon një sërë angazhimesh politike, ekonomike dhe të sigurisë nga të dyja palët.

Pavarësisht se administrata e presidentit Donald Trump e ka paraqitur marrëveshjen si një sukses diplomatik, publikimi i përmbajtjes së saj ka nxitur debat dhe skepticizëm, pasi dokumenti përfshin lehtësime të konsiderueshme për Iranin, përfshirë heqjen graduale të sanksioneve dhe një plan zhvillimi ekonomik me vlerë minimale 300 miliardë dollarë.

Sipas memorandumit, SHBA-ja dhe Irani shpallin fundin e menjëhershëm dhe të përhershëm të operacioneve ushtarake në të gjitha frontet, përfshirë Libanin, duke u angazhuar të mos ndërmarrin veprime armiqësore ndaj njëri-tjetrit dhe të respektojnë sovranitetin e ndërsjellë.

Një nga pikat kryesore të dokumentit parashikon heqjen e bllokadës detare amerikane dhe rikthimin e plotë të trafikut detar në rajon brenda 30 ditësh, ndërsa Irani angazhohet të garantojë lundrimin e lirë të anijeve tregtare në Gjirin Persik dhe Ngushticën e Hormuzit.

Marrëveshja parashikon gjithashtu nisjen e negociatave për një marrëveshje përfundimtare, e cila duhet të arrihet brenda 60 ditësh, me mundësi zgjatjeje nëse palët bien dakord.

Në aspektin ekonomik, SHBA-ja dhe partnerët e saj rajonalë angazhohen të hartojnë një plan për rehabilitimin dhe zhvillimin ekonomik të Iranit me një financim minimal prej 300 miliardë dollarësh. Po ashtu, Uashingtoni do të nisë procesin e heqjes së sanksioneve, përfshirë kufizimet amerikane dhe ato të lidhura me rezolutat ndërkombëtare.

Sa i përket çështjes bërthamore, Irani rithekson angazhimin se nuk do të prodhojë armë bërthamore, ndërsa çështjet që lidhen me uraniumin e pasuruar dhe programin bërthamor do të trajtohen në negociatat për marrëveshjen përfundimtare.

Dokumenti parashikon gjithashtu zhbllokimin gradual të fondeve dhe aseteve iraniane të ngrira, si dhe krijimin e një mekanizmi të posaçëm për monitorimin dhe zbatimin e marrëveshjes.

Sipas CNN, zyrtarët amerikanë e konsiderojnë memorandumin një dokument politik që krijon kornizën për negociatat e ardhshme, ndërsa detajet më të ndjeshme të çështjes bërthamore pritet të diskutohen në raundet e ardhshme diplomatike.

Ceremonia zyrtare e nënshkrimit të marrëveshjes pritet të zhvillohet të premten, ndërsa komuniteti ndërkombëtar po ndjek me vëmendje procesin që mund të ndikojë ndjeshëm në sigurinë dhe stabilitetin e Lindjes së Mesme.