Kryeministri holandez Rob Jetten ka kritikuar ashpër planin e autoriteteve amerikane për të transmetuar drejtpërdrejt ekzekutimin e një të dënuari me vdekje, duke e cilësuar këtë vendim si “absurd”.
Gjatë një konference për shtyp në Hagë, Jetten shprehu kundërshtimin e tij ndaj transmetimit publik të një ekzekutimi dhe paralajmëroi se Holanda mund t’ia përcjellë shqetësimin administratës amerikane përmes kanaleve diplomatike.
“Personalisht, më duket vërtet absurde të transmetosh drejtpërdrejt një ekzekutim me dënim me vdekje”, deklaroi kryeministri holandez.
Ai shtoi se nuk e kishte diskutuar së fundmi këtë çështje me autoritetet amerikane, por se pakënaqësia mund të shprehej në nivel të Ministrisë së Punëve të Jashtme.
Pentagoni planifikon transmetimin e ekzekutimit më 3 dhjetor
Reagimi vjen pasi sekretari amerikan i Mbrojtjes, Pete Hegseth, njoftoi se ushtria amerikane planifikon të kryejë një ekzekutim publik, i pari i këtij lloji në historinë e fundit të vendit.
Sipas njoftimit, majori i ushtrisë Nidal Malik Hasan, i dënuar për vrasjen e 13 personave në bazën ushtarake Fort Hood në vitin 2009, pritet të ekzekutohet më 3 dhjetor.
Pentagoni ka bërë të ditur se ekzekutimi do të transmetohet drejtpërdrejt, por nuk ka sqaruar se cilat platforma do të përdoren.
Kryeministri holandez u bëri thirrje platformave të rrjeteve sociale që të pengojnë përhapjen e pamjeve të ekzekutimit në Europë.
“Sipas meje, u takon platformave të mediave sociale në Europë të parandalojnë shpërndarjen dhe transmetimin e këtyre pamjeve. Por kam frikë se kjo do të jetë e pamundur”, tha Jetten.
Ai paralajmëroi se publikimi i pamjeve në rrjetet sociale europiane mund të shkaktojë një numër të madh raportimesh për përmbajtje të dhunshme.
OKB: Transmetimi i ekzekutimit përbën shkelje të ndalimit të torturës
Edhe Organizata e Kombeve të Bashkuara ka reaguar ndaj planit amerikan.
Zyra e Komisionerit të Lartë të OKB-së për të Drejtat e Njeriut deklaroi për AFP se transmetimi i drejtpërdrejtë i një ekzekutimi do të ishte i barasvlershëm me një ekzekutim publik dhe do të shkelte ndalimin absolut të torturës.
Ndërkohë, Komisioni i Medias në Irlandë sqaroi se platformat që lejojnë përmbajtje me skena dhune ekstreme duhet të zbatojnë mekanizma efektivë të verifikimit të moshës, në mënyrë që këto pamje të mos jenë normalisht të aksesueshme për të miturit.
Rregullatori irlandez po heton aktualisht platformën X për shkelje të mundshme të rregullave të sigurisë në internet, lidhur me kontrollet e moshës.
Komisioni Europian nuk kishte dhënë ende një reagim ndaj kërkesës për koment të POLITICO-s.
