Shqipëria, Greqia dhe Maqedonia e Veriut kanë nisur bashkëpunimin për përgatitjen e një kandidature të përbashkët për përfshirjen e rajonit të Prespës në Listën e Trashëgimisë Botërore të UNESCO-s.
Nisma synon mbrojtjen e pasurive natyrore, historike dhe kulturore të zonës, si dhe zhvillimin e turizmit të qëndrueshëm në të tre vendet.
Ministri i Turizmit, Kulturës dhe Sportit, Blendi Gonxhja, njoftoi se ndodhet në Prespë së bashku me ministren greke të Kulturës, Lina Mendoni, dhe ministrin e Kulturës dhe Turizmit të Maqedonisë së Veriut, Sedat Sulejman, për të nisur procesin e përbashkët të kandidimit.
Sipas Gonxhes, Bashkimi Europian do të financojë me 2 milionë euro hartimin e studimit të fizibilitetit, i cili do të shërbejë si bazë për përgatitjen e kandidaturës treshtetërore.
“Prespa na bashkon përmes natyrës, historisë dhe kulturës së saj. Duam ta mbrojmë këtë pasuri dhe të krijojmë më shumë mundësi për komunitetet që jetojnë këtu dhe më shumë turizëm të qëndrueshëm”, deklaroi ministri.
Investime në trashëgiminë kulturore dhe turizëm
Gonxhja u ndal edhe te investimet e realizuara në pjesën shqiptare të Prespës, duke përmendur restaurimin e pikturave murale në Kishën e Shën Marisë në Maligrad, ndriçimin e kishës dhe të shtegut që të çon drejt saj, si dhe Shtëpinë Muze të Sterjo Spasses në Gollomboç.
Sipas ministrit, këto ndërhyrje kanë ndihmuar në pasurimin e ofertës kulturore dhe turistike të zonës.
Një tjetër element i bashkëpunimit është projekti ACT4PRESPA, i financuar nga Bashkimi Europian, i cili përfshin institucione nga të tre vendet për konservimin, digjitalizimin dhe promovimin e trashëgimisë së Prespës së Madhe dhe Prespës së Vogël.
“Duam gjithashtu të zhvillojmë itinerare të përbashkëta turistike, misione kërkimore e ekspedita për njohjen dhe promovimin e Prespës dhe Ohrit, krahas shkëmbimeve artistike, sportive dhe rinore me fqinjët tanë”, u shpreh Gonxhja.
Kandidatura e përbashkët synon të forcojë mbrojtjen e trashëgimisë ndërkufitare dhe të krijojë mundësi të reja ekonomike për komunitetet lokale.
Përfshirja e Prespës në listën e UNESCO-s mbetet një objektiv i procesit të nisur nga tre vendet, ndërsa përgatitja e dokumentacionit dhe vlerësimi ndërkombëtar do të përcaktojnë hapat e mëtejshëm.
