Zyra e Netanyahut sulmon kryebashkiakun e Nju Jorkut pas deklaratave për arrestimin e tij
Zyra e kryeministrit izraelit Benjamin Netanyahu ka dënuar deklaratat e kryetarit të bashkisë së Nju Jorkut, Zohran Mamdani, i cili tha se do të shqyrtonte mundësinë e arrestimit të Netanyahut nëse ai viziton qytetin për Asamblenë e Përgjithshme të Kombeve të Bashkuara.
Në një reagim të publikuar në platformën X, zyra e Netanyahut i bëri thirrje Mamdanit të fokusohet te problemet e Nju Jorkut, në vend që të sulmojë udhëheqësin izraelit.
“Z. Mamdani duhet të përqendrohet në riparimin e dëmit që politikat e tij po shkaktojnë në Nju Jork”, thuhet në deklaratë.
Sipas zyrës së kryeministrit izraelit, kryebashkiaku i ri po përpiqet të largojë vëmendjen nga politikat e tij duke sulmuar “udhëheqësin e shtetit hebre, demokracisë së vetme në Lindjen e Mesme”.
Reagimi erdhi pas një interviste të Mamdanit për The New York Times, ku ai deklaroi se “vendi i Netanyahut është në Hagë”, duke iu referuar urdhër-arrestit të lëshuar ndaj kryeministrit izraelit nga Gjykata Penale Ndërkombëtare (GJPN).
Mamdani e cilësoi Netanyahun “një kriminel lufte për të cilin është lëshuar një urdhër arresti”, por pranoi se nuk është i sigurt nëse ka autoritetin ligjor për të arrestuar një udhëheqës të huaj në territorin e Nju Jorkut.
“Ne do të bëjmë atë që më lejon ligji të bëj në Nju Jork”, deklaroi ai.
Gjykata Penale Ndërkombëtare ka lëshuar urdhër-arrest ndaj Benjamin Netanyahut për akuza që lidhen me konfliktin në Gaza, megjithatë Izraeli nuk e njeh juridiksionin e GJPN-së dhe i ka hedhur poshtë akuzat. Deklaratat e Mamdanit pritet të nxisin debate të reja politike në SHBA dhe Izrael, ndërsa Netanyahu pritet të marrë pjesë në Asamblenë e Përgjithshme të OKB-së në muajt e ardhshëm.
