Videoja e Ben-Gvir ndez reagime globale: vende të shumta kërkojnë shpjegime nga Izraeli

Publikimi i një videoje nga ministri izraelit i Sigurisë Kombëtare, Itamar Ben-Gvir, ku shfaqen aktivistët e “Global Sumud Flotilla” të gjunjëzuar dhe me duart e lidhura, ka shkaktuar një valë reagimesh të forta ndërkombëtare dhe kritika të ashpra ndaj autoriteteve izraelite.

Pamjet, të cilat janë konsideruar nga shumë vende si poshtëruese dhe në shkelje të dinjitetit njerëzor, kanë nxitur reagime të menjëhershme diplomatike. Franca, Holanda, Belgjika, Spanja dhe Kanadaja kanë thirrur ambasadorët izraelitë për të kërkuar sqarime lidhur me mënyrën e trajtimit të aktivistëve të ndaluar.

Ministri i Jashtëm francez, Jean-Noël Barrot, shprehu indinjatë të thellë për pamjet, duke dënuar publikisht trajtimin e të ndaluarve. Nga ana tjetër, ministri i Jashtëm i Holandës, Tom Berendsen, i cilësoi pamjet si “tronditëse dhe të papranueshme”, duke theksuar se ato cenojnë rëndë dinjitetin njerëzor dhe normat ndërkombëtare.

Edhe Belgjika reagoi ashpër, me ministrin e Jashtëm Maxime Prévot që bëri të ditur se mes personave të arrestuar ndodhen edhe shtetas belgë, çka e bën çështjen edhe më sensitive për autoritetet e vendit.

Reagime të forta erdhën edhe nga Mbretëria e Bashkuar, ku ministrja Yvette Cooper u shpreh “vërtet e tronditur” nga pamjet dhe kërkoi sqarime të menjëhershme nga Izraeli lidhur me trajtimin e aktivistëve.

Ambasadori gjerman në Izrael, Steffen Seibert, e cilësoi trajtimin ndaj të ndaluarve si “krejtësisht të papranueshëm”, ndërsa ministri i Jashtëm spanjoll, José Manuel Albares, përdori tone edhe më të ashpra, duke e quajtur videon “monstruoze, çnjerëzore dhe të turpshme”, si dhe kërkoi një falje publike nga autoritetet izraelite.

Edhe Irlanda reagoi me tone të forta, ku ministrja Helen McEntee kërkoi lirimin e menjëhershëm të shtetasve irlandezë të ndaluar, duke theksuar rëndësinë e respektimit të të drejtave të njeriut.

Kanadaja iu bashkua kësaj vale reagimesh ndërkombëtare, me ministren e Jashtme Anita Anand që deklaroi se trajtimi i civilëve duhet të merret “shumë seriozisht” dhe kërkon një reagim të shpejtë dhe konkret nga autoritetet izraelite.

Ngjarja ka shtuar tensionet diplomatike dhe ka rikthyer në vëmendje ndërkombëtare çështjen e trajtimit të aktivistëve dhe të drejtave të njeriut në zonat e konfliktit, ndërsa pritet që reagimet dhe presioni ndërkombëtar ndaj Izraelit të vijojnë edhe në ditët në vijim.