Trump: Po shqyrtoj një sulm masiv ndaj Iranit, Teherani nuk ka përjetuar ende “mjaftueshëm dhimbje”
Presidenti i Shteteve të Bashkuara, Donald Trump, ka deklaruar se po shqyrton seriozisht rifillimin e operacioneve të mëdha ushtarake kundër Iranit, duke paralajmëruar se mund të ndërmerren sulme më të fuqishme se ato të deritanishmet.
Në një deklaratë të cituar nga Axios, Trump tha se është pranë marrjes së një vendimi për një ofensivë të re ushtarake.
“Po shqyrtoj një sulm masiv. Më të madh se kurrë më parë. Jam afër marrjes së një vendimi. Jemi të gjithë gati për të”, u shpreh presidenti amerikan.
Trump pranoi se një vendim i tillë do të sillte pasoja, por theksoi se ende nuk ka dhënë urdhrin përfundimtar. Ai shtoi se Izraeli do t’i bashkohej menjëherë operacionit ushtarak nëse do t’i kërkohej.
“Izraeli do të bashkohej brenda dy minutash nëse do t’ia kërkoja”, deklaroi ai, duke lënë të kuptohet se përfshirja e Izraelit mund të sillte edhe hakmarrje nga Irani.
Presidenti amerikan u shpreh gjithashtu se Teherani dëshiron të negociojë, por sipas tij nuk është ende gati të arrijë një marrëveshje.
“Ata nuk kanë përjetuar ende dhimbje të mjaftueshme”, tha Trump.
Sipas autoriteteve amerikane, objektivi kryesor i operacioneve ushtarake është dobësimi i kapaciteteve detare dhe ushtarake të Iranit në zonën e Ngushticës së Hormuzit, një prej korridoreve më të rëndësishme për transportin global të energjisë.
Uashingtoni pretendon se sulmet synojnë objektiva ushtarake që përdoren për të kërcënuar lundrimin në këtë ngushticë strategjike.
Megjithatë, përshkallëzimi i tensioneve ka rritur shqetësimet ndërkombëtare për mundësinë e një konflikti më të gjerë në Lindjen e Mesme.
