Presidenti amerikan, Donald Trump, ka deklaruar se do ta mbështeste hapjen e fabrikave të prodhuesve kinezë të automjeteve në Shtetet e Bashkuara, me kusht që makinat të ndërtoheshin në territorin amerikan dhe kompanitë të punësonin punëtorë vendas.
Gjatë një interviste për Fox News, Trump tha se nuk do të kundërshtonte investimet kineze në industrinë amerikane të automobilave nëse ato do të krijonin vende pune dhe kapacitete të reja prodhuese në vend.
“Nëse Kina do të donte të vinte dhe të hapte një fabrikë për të ndërtuar makinat e saj këtu, unë do të isha dakord me këtë”, deklaroi presidenti amerikan.
Trump solli si shembull kompanitë japoneze, të cilat prej vitesh prodhojnë automjete në SHBA dhe punësojnë qytetarë amerikanë.
“Gjëja e rëndësishme është që ata punësojnë njerëzit tanë”, theksoi ai.
Presidenti sqaroi se nuk dëshiron që kompanitë kineze t’i prodhojnë automjetet në Meksikë dhe më pas t’i eksportojnë drejt tregut amerikan. Sipas tij, përfitimi ekonomik dhe vendet e punës duhet të krijohen brenda SHBA-së.
“Unë nuk i përçmoj makinat kineze”, u shpreh Trump, duke sinjalizuar se kundërshtimi i tij lidhet më shumë me vendin e prodhimit dhe ndikimin te punësimi sesa me origjinën e kompanive.
Deklaratat e tij bien ndesh me qëndrimin e një pjese të ligjvënësve dhe prodhuesve amerikanë të automjeteve, të cilët i kanë kërkuar administratës të kufizojë aksesin e kompanive kineze në tregun vendas. Ata druhen se prodhuesit kinezë, veçanërisht në sektorin e automjeteve elektrike, mund të ushtrojnë presion të madh mbi industrinë amerikane për shkak të çmimeve konkurruese dhe kapaciteteve të larta prodhuese.
Debati merr rëndësi të veçantë përpara takimit të planifikuar në Uashington mes Trumpit dhe presidentit kinez, Xi Jinping, ku marrëdhëniet tregtare pritet të jenë ndër temat kryesore.
Senatorja demokrate e Michiganit, Elissa Slotkin, kishte deklaruar më herët se qarkullonin informacione sipas të cilave Trump mund të lejonte shitjen e automjeteve kineze në SHBA si pjesë e një marrëveshjeje më të gjerë me Pekinin. Ajo e cilësoi një skenar të tillë si “një gabim strategjik”.
Trump i hodhi poshtë këto pretendime, duke i quajtur “një thashethem krejtësisht të pabazuar”. Ai këmbënguli se administrata e tij vijon t’i mbajë jashtë tregut amerikan automjetet kineze të prodhuara jashtë vendit.
Qëndrimi i presidentit sugjeron një dallim mes lejimit të importeve kineze dhe pranimit të investimeve nga kompani kineze që do të prodhonin drejtpërdrejt në SHBA.
Administrata e ish-presidentit Joe Biden vendosi në fillim të vitit 2025 kufizime që pengojnë prodhuesit kinezë të shesin ose të ndërtojnë automjete pasagjerësh në SHBA. Uashingtoni aplikon gjithashtu tarifa që kalojnë 100 për qind për automjetet elektrike të prodhuara në Kinë.
