SHBA dhe Meksika rinisin negociatat tregtare, Kanadaja mbetet jashtë bisedimeve
Shtetet e Bashkuara dhe Meksika nisën këtë të martë në Ciudad de Mexico raundin e tretë të negociatave për rishikimin e Marrëveshjes Tregtare SHBA-Meksikë-Kanada (USMCA), ndërsa Kanadaja nuk po merr pjesë në bisedime, sipas agjencisë Reuters.
Negociatat zhvillohen vetëm një ditë pasi presidenti amerikan, Donald Trump, njoftoi vendosjen e tarifave të reja prej 50% ndaj një sërë produktesh kanadeze, duke përshkallëzuar tensionet tregtare mes Uashingtonit dhe Otavës.
Administrata amerikane synon të rinegociojë marrëveshjen për të ulur deficitin tregtar të SHBA-së, për të rikthyer më shumë prodhim industrial në territorin amerikan dhe për të rritur përmbajtjen e komponentëve amerikanë në automjetet e prodhuara në Amerikën e Veriut.
Nga ana tjetër, Meksika synon që një marrëveshje e re të arrihet deri në fund të vitit. Qeveria meksikane kërkon gjithashtu lehtësimin e tarifave amerikane për automjetet, çelikun dhe aluminin që eksportohen drejt Shteteve të Bashkuara.
Një nga çështjet kryesore të diskutimeve është edhe forcimi i mbrojtjes së tregut të Amerikës së Veriut nga produktet kineze. Palët synojnë të vendosin masa që do të pengojnë hyrjen e mallrave kineze në tregun amerikan përmes Meksikës ose Kanadasë.
