Sekretari amerikan i Shtetit, Marco Rubio, ka deklaruar se një “aktor i huaj” është i përfshirë në komplotin e dyshuar për sulm ndaj bazës ajrore RAF Fairford në Britaninë e Madhe, e cila përdoret edhe nga ushtria amerikane. Rubio nuk identifikoi shtetin që dyshohet se qëndron pas ngjarjes.
“Ajo që ndodhi këtë fundjavë mund të kishte qenë një kërcënim shumë serioz”, deklaroi Rubio gjatë një interviste për Fox News, duke paralajmëruar se në ditët në vijim pritet të dalin më shumë informacione nga hetimi.
Sipas tij, incidenti “qartësisht përfshinte duart e një aktori të huaj”, por kryediplomati amerikan tha se nuk mund të jepte ende detaje të tjera për shkak të hetimit në vazhdim.
Deklaratat e Rubios shkojnë më tej se ato të autoriteteve britanike. Policia kundër terrorizmit në Britani ka bërë të ditur se po heton “çdo pistë të mundshme”, përfshirë mundësinë që personat e përfshirë të kenë vepruar si ndërmjetës të një shteti të huaj, me ose pa dijeni të plotë për këtë. Deri tani, autoritetet britanike nuk kanë fajësuar publikisht ndonjë shtet.
Pesë shtetas britanikë, të moshave 23 deri në 25 vjeç, u arrestuan pranë RAF Fairford të dielën nën dyshimet për përgatitjen e një akti terrorist dhe shkelje të lidhura me eksplozivët. Arrestimet erdhën pasi u raportuan tre furgonë të dyshimtë pranë bazës.
Të pestë u liruan me kusht të hënën, por vazhdojnë të jenë nën hetim. Vendimi për lirimin e tyre shkaktoi reagimin e Presidentit Donald Trump, i cili deklaroi se vetë nuk do të kishte vepruar në këtë mënyrë.
Trump ngriti gjithashtu mundësinë e një lidhjeje me Iranin, pa paraqitur publikisht prova për këtë pretendim. Edhe hetuesit britanikë po shqyrtojnë mundësinë e përfshirjes së një shteti të huaj, por deri tani nuk kanë konfirmuar një lidhje me Teheranin.
Ambasada iraniane në Londër ka mohuar kategorikisht çdo përfshirje, duke i cilësuar spekulimet që lidhin Iranin me incidentin si të pabazuara.
RAF Fairford, në perëndim të Anglisë, është një bazë britanike që përdoret prej kohësh nga forcat amerikane. Prej saj janë kryer edhe operacione të bombarduesve amerikanë gjatë konfliktit të këtij viti me Iranin, çka e ka vendosur bazën në qendër të shqetësimeve të shtuara të sigurisë.
Hetimi vijon dhe autoritetet britanike kanë theksuar se po mbajnë të hapura disa pista, ndërsa ende nuk është përcaktuar publikisht motivi apo një përgjegjës i huaj për komplotin e dyshuar.
