Kryeministri Edi Rama nis sot vizitën e tij në Shtetet e Bashkuara të Amerikës, në kuadër të javës së Kombeve të Bashkuara.
Përmes një postimi në Facebook, kreu i qeverisë bëri të ditur se ndalesa e parë do të jetë në Michigan, ku do të zhvillojë një takim me komunitetin shqiptar.
“Këtë herë vizita e javës së Kombeve të Bashkuara në Amerikë nis sot pasdite me shqiptarët dhe për shqiptarët, në Michigan, ku kam nderin të jem i ftuar nga komuniteti e ku ftoj këdo që dëshiron të vijë të na bashkohet”, shkroi Rama.
Takimi me shqiptarët është planifikuar të zhvillohet sot në orën 18:00, sipas orës lokale, në hotelin “Marriott of Troy”, në adresën 200 W Big Beaver Road, Troy, Michigan.
Aktiviteti mbahet nën moton “Me shqiptarët, për shqiptarët” dhe shënon nisjen e agjendës së kryeministrit gjatë qëndrimit në Shtetet e Bashkuara.
