Shqipëria pritet të mbyllë sot përkohësisht Kapitullin 20, “Ndërmarrjet dhe Politikat Industriale”, në kuadër të negociatave për anëtarësimin në Bashkimin Europian.
Nga Luksemburgu, ku po zhvillohet Konferenca e 10-të Ndërqeveritare Shqipëri–BE, kryeministri Edi Rama deklaroi se procesi i integrimit po ecën sipas planit dhe se qeveria synon të përshpejtojë mbylljen e kapitujve negociues deri në fund të vitit.
Në një prononcim për mediat, gjatë mbërritjes në Qendrën Europiane të Konventave, Rama u shpreh se Shqipëria është e vendosur të përmbushë të gjitha detyrimet brenda afateve të përcaktuara.
“Jemi rikthyer për të mbyllur një tjetër kapitull dhe për të riafirmuar se përparimi drejt objektivit tonë historik është i pandalshëm. Ndërkohë, sapo kam zhvilluar disa takime inkurajuese lidhur me hapat e ardhshëm”, deklaroi kryeministri.
Ai theksoi se plani i qeverisë mbetet ambicioz dhe shprehu bindjen se Shqipëria do t’i përmbushë angazhimet e saj në kohë.
“Brenda këtij viti synojmë të mbyllim edhe më shumë kapituj dhe jam absolutisht i bindur se, për sa na përket neve, do t’i përmbushim të gjitha detyrimet brenda afateve të përcaktuara”, tha Rama.
Rama: Të paktën dyfishi i kapitujve aktualë presin të mbyllen
I pyetur se sa kapituj të tjerë mund të mbyllen deri në fund të vitit, kreu i qeverisë nuk dha një shifër përfundimtare, por deklaroi se objektivi është të paktën dyfishi i numrit aktual.
“Nuk po merrem me numra, por thjesht po them se sot mbyllim edhe një kapitull tjetër, duke e çuar numrin në katër. Dhe janë të paktën dyfishi i këtij numri që presin të mbyllen brenda këtij viti. Të shohim!”, u shpreh ai.
Me mbylljen e përkohshme të Kapitullit 20, numri i kapitujve negociues të mbyllur përkohësisht nga Shqipëria do të arrijë në katër.
Mbyllja e kapitujve mbetet pjesë e procesit të negociatave të anëtarësimit dhe nuk nënkupton përfundimin e plotë të tyre, ndërsa Shqipëria synon të përmbushë objektivat e vendosura në rrugën drejt Bashkimit Europian.
