Policia e Tiranës ka dalë me një njoftim zyrtar pas publikimit dhe shpërndarjes në disa portale dhe platforma online të materialeve filmike me përmbajtje intime.
Drejtoria Vendore e Policisë Tiranë bën me dije se ka nisur hetimet kryesisht për rastin, ndërsa çështja po ndiqet nga Sektori për Hetimin e Krimeve Kibernetike.
Sipas njoftimit, specialistët po kryejnë veprime hetimore për identifikimin e adresave IP, faqeve dhe profileve që kanë publikuar apo shpërndarë materialet.
Në të njëjtën kohë, Policia po ndërmerr procedurat për heqjen e përmbajtjeve nga platformat ku janë publikuar.
Materialet procedurale i janë referuar Prokurorisë për veprat penale “Përgjimi i paligjshëm i të dhënave kompjuterike”, “Ndërhyrja në të dhënat kompjuterike”, “Ndërhyrja e padrejtë në jetën private” dhe “Keqpërdorimi i pajisjeve”.
Policia nuk ka dhënë detaje të tjera mbi personat e përfshirë, ndërsa hetimet vijojnë për të identifikuar përgjegjësit e publikimit dhe shpërndarjes së materialeve.
