Ministri gjerman i Mbrojtjes, Boris Pistorius, kundërshtoi të mërkurën kritikat se Berlini po favorizon industrinë kombëtare të armatimeve në kurriz të bashkëpunimit europian. Sipas tij, mbrojtja e prodhuesve vendas është një qasje që ndiqet nga të gjitha vendet europiane me industri ushtarake.
Gjatë Konferencës së Sigurisë në Berlin, Pistorius iu përgjigj kryetares së Komisionit të Mbrojtjes të Parlamentit Europian, Marie-Agnes Strack-Zimmermann. Ajo e akuzoi Gjermaninë se mbetet tepër e përqendruar te blerja e armëve nga kompanitë e saj, në vend që të zhvillojë më shumë projekte me partnerët europianë.
“Të gjithë thonë, njëzëri dhe çdo ditë, jo vetëm të dielave, se duam më shumë bashkëpunim në mbrojtje dhe më shumë projekte të përbashkëta armatimi. Por kur vjen puna te vendimet konkrete, çdo vend thotë: ‘Industria ime nuk duhet të mbetet pas’”, deklaroi Pistorius.
Debati nxjerr në pah një nga pengesat kryesore për forcimin e mbrojtjes europiane. Ndërsa qeveritë synojnë të rrisin kapacitetet ushtarake dhe blerjet e përbashkëta, ato kërkojnë njëkohësisht të mbrojnë vendet e punës, fabrikat dhe investimet brenda kufijve të tyre.
Sipas të dhënave të Agjencisë Europiane të Mbrojtjes, vendet e BE-së shpenzuan 115 miliardë euro për pajisje ushtarake gjatë vitit 2025, por vetëm 24% e kësaj shume u përdor për blerje të përbashkëta.
Brukseli synon që kjo përqindje të arrijë të paktën në 40% deri në vitin 2030. Për të nxitur bashkëpunimin, BE-ja ka krijuar edhe programin SAFE, i cili ofron 150 miliardë euro kredi për investime në mbrojtje dhe prokurime të përbashkëta.
Megjithatë, interesat kombëtare vijojnë të ndikojnë në shpërndarjen e kontratave. Qeveria polake, për shembull, ka deklaruar se synon që 89% e afro 44 miliardë eurove që do të marrë nga SAFE të shpenzohen në industrinë vendase.
Pistorius e mbrojti këtë qasje, duke argumentuar se qeveritë kanë përgjegjësi edhe për ekonomitë dhe kapacitetet industriale të vendeve të tyre.
“Do ta kundërshtoja kritikën në pyetjen tuaj. Dhe nëse duhet bërë një kritikë, ajo nuk duhet t’i drejtohet Gjermanisë, por të gjithë europianëve që kanë industri të mbrojtjes”, u shpreh ai.
