Kancelari gjerman Friedrich Merz ka përshëndetur nënshkrimin e marrëveshjes mes Shteteve të Bashkuara dhe Iranit, duke e cilësuar atë një hap të rëndësishëm drejt uljes së tensioneve në Lindjen e Mesme dhe garantimit të lirisë së lundrimit në Ngushticën e Hormuzit.

Duke folur për mediat, Merz deklaroi se Gjermania është e gatshme të shqyrtojë mundësitë për të kontribuar në sigurinë detare në rajon, përfshirë ofrimin e anijeve për pastrimin e minave detare ose mbështetje të tjera ushtarake në kuadër të masave të dakordësuara nga partnerët ndërkombëtarë.

“Qeveria gjermane do të sqarojë se si mund të ndihmojë në këtë përpjekje, për shembull duke ofruar anije për pastrimin e minave detare ose mbështetje ushtarake për masat për të cilat është rënë dakord”, tha Merz.

Ai theksoi se çdo angazhim i mundshëm ushtarak do të kërkojë bazën e nevojshme ligjore dhe diskutim në Bundestag, duke shtuar se çështja do të trajtohet me kujdes dhe në konsultim me institucionet përkatëse.

Edhe kryeministri i Luksemburgut, Luc Frieden, përshëndeti marrëveshjen, duke theksuar rëndësinë e paqes dhe stabilitetit në një zonë strategjike për ekonominë globale.

“Çdo marrëveshje që çon drejt paqes është e mirëpritur. Ngushtica e Hormuzit është e rëndësishme për botën dhe kërkon stabilitet, për të cilin Luksemburgu është i gatshëm të kontribuojë”, deklaroi ai.

Ndërkohë, Marina gjermane ka nisur përgatitjet për një mision të mundshëm në rajon. Ministria e Mbrojtjes bëri të ditur se anija çminuese “Fulda” dhe anija logjistike “Mosel” kanë kaluar Kanalin e Suezit dhe po lëvizin drejt portit të Xhibutit, ku do të qëndrojnë në gatishmëri.

Ministri gjerman i Mbrojtjes, Boris Pistorius, deklaroi gjatë takimit të ministrave të Mbrojtjes të NATO-s në Bruksel se Berlini dëshiron të jetë i përgatitur për të reaguar shpejt në rast nevoje. Sipas tij, anijet mund të përfshihen në një mision të mundshëm për garantimin e lirisë së lundrimit në Ngushticën e Hormuzit, të mbështetura nga sisteme çminimi, zhytës ushtarakë dhe forca mbrojtëse.

Pistorius sqaroi gjithashtu se dislokimi aktual i anijeve nuk kërkon mandat të Bundestagut, pasi ato operojnë në kuadër të misionit detar të Bashkimit Evropian “Aspides”. Në bordin e dy mjeteve ndodhen rreth 140 ushtarë gjermanë.

Zhvillimet vijnë pas marrëveshjes së fundit mes Uashingtonit dhe Teheranit, e cila parashikon rikthimin e lundrimit normal në Ngushticën e Hormuzit dhe hapjen e një periudhe negociatash për çështjet e mbetura pezull, përfshirë programin bërthamor iranian.