Izraeli dhe Hezbollahu kanë rënë dakord për një armëpushim, i cili ka hyrë në fuqi në orën 16:00 me orën lokale të së premtes, duke shënuar një hap të rëndësishëm drejt uljes së tensioneve në kufirin Izrael-Liban.

Lajmi është konfirmuar për BBC nga një zyrtar amerikan, i cili bëri të ditur se marrëveshja është arritur pas disa ditësh negociatash intensive dhe përpjekjesh diplomatike për të shmangur një përshkallëzim më të gjerë të konfliktit në rajon.

Armëpushimi vjen pas një serie sulmesh dhe kundërsulmesh mes forcave izraelite dhe Hezbollahut në jug të Libanit, përplasje që shkaktuan viktima, dëme materiale dhe shqetësime të mëdha për sigurinë në Lindjen e Mesme.

Sipas burimeve diplomatike, marrëveshja synon ndalimin e menjëhershëm të veprimeve ushtarake nga të dyja palët dhe krijimin e kushteve për stabilizimin e situatës në zonën kufitare.

Zhvillimi konsiderohet i rëndësishëm edhe në kontekstin e përpjekjeve më të gjera diplomatike në rajon, pas memorandumit të mirëkuptimit mes Shteteve të Bashkuara dhe Iranit, që synon uljen e tensioneve dhe rikthimin e stabilitetit në Lindjen e Mesme.

Deri tani nuk janë bërë publike detaje të tjera mbi kushtet e armëpushimit, ndërsa pritet që në orët në vijim palët dhe ndërmjetësit ndërkombëtarë të japin më shumë informacion mbi zbatimin e marrëveshjes.