Macron dhe Merz zotohen për marrëveshje kyçe deri në fund të vitit: Europa duhet të veprojë për të mbetur konkurruese

Presidenti francez Emmanuel Macron dhe kancelari gjerman Friedrich Merz u angazhuan të premten të arrijnë marrëveshje për një sërë çështjesh strategjike deri në fund të këtij viti, duke paralajmëruar se ekonomia evropiane rrezikon të humbasë konkurrueshmërinë përballë Shteteve të Bashkuara dhe Kinës nëse nuk ndërmerren masa të shpejta.

Në përfundim të dy ditëve të takimeve franko-gjermane, dy liderët deklaruan se do të përshpejtojnë punën për të adresuar fluksin e eksporteve kineze të subvencionuara që po hyjnë në tregun e përbashkët evropian, për të finalizuar buxhetin shtatëvjeçar të Bashkimit Evropian dhe për të ndërtuar një bashkim të tregjeve të kapitalit, të ngjashëm me modelin amerikan.

Macron theksoi se zbatimi i këtyre reformave është jetik për të ardhmen e Evropës.

“Plani i zbatimit duhet të ecë sa më shpejt dhe me sa më shumë vendosmëri. Kjo është thelbësore për ne, është jetike, ashtu siç është jetike edhe për Evropën”, deklaroi presidenti francez.

Edhe kancelari Merz nënvizoi nevojën për veprim të menjëhershëm.

“Bashkëpunimi mes Gjermanisë dhe Francës është thelbësor në një kohë kur Rusia kërcënon sigurinë tonë, Republika Popullore e Kinës sfidon ekonominë tonë dhe partneriteti transatlantik nuk mund të merret më si i mirëqenë”, u shpreh ai.

Deklaratat e dy liderëve vijnë në një kohë kur në Francë po shtohen spekulimet për mundësinë që zgjedhjet presidenciale të vitit 2027 të fitohen nga liderja e së djathtës ekstreme, Marine Le Pen, e cila ka shprehur vazhdimisht qëndrime euroskeptike dhe ka premtuar uljen e ndjeshme të kontributit të Francës në buxhetin e Bashkimit Evropian.

I pyetur nëse një fitore e mundshme e Le Pen mund të rrezikojë marrëveshjet e arritura mes Parisit dhe Berlinit, Macron bëri thirrje të mos mbështetet gjithçka te sondazhet.

“Kini kujdes me sondazhet. Besoni te populli francez. Mos parashikoni gjithmonë skenarin më të keq për ta”, deklaroi ai.

Nga ana e tij, Merz tha se Gjermania do të vazhdojë të punojë për ruajtjen e marrëdhënieve të ngushta me Francën, pavarësisht rezultatit të zgjedhjeve presidenciale.

“Ne do të vazhdojmë të bëjmë gjithçka që mundemi për të siguruar që bashkëpunimi ynë me fqinjët tanë francezë të mbetet sa më i afërt, i thellë dhe i bazuar në besim. Kjo vlen pavarësisht se si vendosin votuesit në Francë”, tha ai.

Megjithatë, analistët vlerësojnë se një presidencë e mundshme e Marine Le Pen mund ta bëjë më të vështirë funksionimin e boshtit franko-gjerman, pasi ajo dhe partia e saj kanë mbajtur tradicionalisht qëndrime kritike ndaj partneritetit mes dy vendeve.

Në planin ekonomik, Macron njoftoi se Franca dhe Gjermania do të shqyrtojnë së bashku propozimet e Komisionit Evropian për krijimin e burimeve të reja të të ardhurave të Bashkimit Evropian, përmes taksave të përbashkëta që do ta bënin bllokun më pak të varur nga kontributet e shteteve anëtare.

Takimi shënoi gjithashtu një afrim të qëndrimeve mes Parisit dhe Berlinit për politikën tregtare ndaj Kinës. Në deklaratën e përbashkët, të dy qeveritë i kërkuan Komisionit Evropian të nisë më shumë hetime mbi praktikat tregtare të Kinës dhe të forcojë instrumentet mbrojtëse të BE-së kundër konkurrencës së pandershme.

Macron bëri të ditur se deri në fund të vitit Franca dhe Gjermania do të paraqesin edhe një plan të përbashkët për trajtimin e këtyre sfidave ekonomike dhe tregtare.