Koronavirusi/Ballkani Perëndimor bën thirrje për përjashtim nga kufizimet e eksportit të paisjeve mjekësore të BE-së
Ministrat e jashtëm të gjashtë vendeve të Ballkanit Perëndimor i kanë kërkuar Brukselit të përjashtojë vendet e tyre nga kufizimet e eksportit të BE-së për pajisjet mbrojtëse mjekësore.
Ndërsa koronavirusi u përhap në të gjithë kontinentin, BE muajin e kaluar miratoi një skemë autorizimi eksporti për disa pajisje mbrojtëse personale siç janë maskat për fytyrën me qëllim ndalimin e kryeqyteteve të BE-së që të imponojnë ndalime kombëtare.
Kufizimi i eksportit kishte për qëllim gjithashtu të rrisë solidaritetin midis vendeve të BE-së, ndërsa parandalonte që vendet e huaja të blinin sasi të mëdha të mjeteve mbrojtëse që ishin të nevojshme për vetë vendet anëtare të BE-së.
Por ministrat e jashtëm të Shqipërisë, Bosnje-Hercegovinës, Kosovës, Malit të Zi, Maqedonisë së Veriut dhe Serbisë shprehën pakënaqësinë nëpërmjet një letre drejtuar shefit të politikës së jashtme të BE-së Josep Borrell, Komisionerit të Tregtisë Phil Hogan dhe Komisionerit të Fqinjësisë Olivér Várhelyi – se kufizimet e kishin bërë ” më të vështirë “për vendet e tyre blerjen e pajisjeve mbrojtëse. Për këtë arsye ata i kërkuan BE-së një përjashtim.
“Rajoni ynë ka vetëm një popullsi prej 17 milion njerëz. Blerja jonë e këtyre mallrave nuk do të ketë ndikim negativ në tregun e Bashkimit Evropian“, thuhet në letrën e përbashkët.
Ministrat vunë në dukje se Brukseli kishte përjashtuar tetë fqinjë të tjerë – Norvegjinë, Islandën, Lihtenshtajnin, Zvicrën, Ishujt Faeroe, Andorra, San Marino dhe Qytetin Vatikan – nga kufizimet.
Ata shtuan se lirimi i Ballkanit Perëndimor nga kontrolli i eksportit “do të dërgonte një sinjal të fortë për qytetarët tanë se në këtë jemi të gjithë së bashku si evropianë“.
Katër nga gjashtë vendet që nënshkruan letrën – Shqipëria, Mali i Zi, Maqedonia e Veriut dhe Serbia – janë vënde kandidatë për anëtarësim në BE.
Eunewa.al
