Gjykata Europiane e Drejtësisë: Polonia të pezullojë panelin disiplinor për gjyqtarët
Gjykata Europiane e Drejtësisë (ECJ) ka urdhëruar Poloninë të pezullojë një dhomë disiplinore të diskutueshme për gjyqtarët derisa të mund të vendosë nëse organi është mjaft i pavarur, sipas edhe një ligji të BE-së.
Kjo përbën një çështje më shumë në mosmarrëveshjet lidhur me shtetin e së drejtës mes Komisionit Europian dhe qeverisë konservatore të Polonisë.
“Dhoma disiplinore e Gjykatës Supreme është nën ndikimin e tepërt politik dhe ka fuqinë të hetojë dhe ndëshkojë gjyqtarët e zakonshëm për vendimet e tyre gjyqësore”, argumenton ekzekutivi i BE-së.
Megjithë vendimet ligjore nga gjykata e lartë e Bashkimit Europian, kjo dhomë vazhdon të funksionojë.
“Kjo krijon një rrezik të dëmtimit të pariparueshëm për gjyqtarët polakë”, tha Komisioni i BE-së në janar duke i kërkuar ECJ-së të ndërmarrë veprime të menjëhershme.
Gjykatësit me qendër në Luksemburg miratuan sot kërkesën e komisionit duke gjetur se argumentet e tij janë të bazuara dhe se ekziston rreziku i “dëmtimit serioz të rendit juridik të BE”. Gjykata do të vendosë mbi çështjen në një datë të mëvonshme.
Në vitin 2017, Polonia miratoi regjimin e ri disiplinor për gjyqtarët e Sąd Najwyższy (Gjykata Supreme, Poloni) dhe gjykatat e zakonshme. Në mënyrë të veçantë, nën atë reformë legjislative, u krijua një Dhomë e re, Izba Dyscyplinarna (Dhoma Disiplinore) brenda Sąd Najwyższy.
Juridiksioni i “Izba Dyscyplinarna” përfshin, ndër të tjera, çështjet disiplinore në lidhje me gjyqtarët e Sąd Najwyższy dhe, në apel, ato që kanë të bëjnë me gjyqtarët e gjykatave të zakonshme.
Eunews.al
