Bashkimi Evropian në Shqipëri ka prezantuar një skemë të re financimi për kompanitë shqiptare të përpunimit të drurit, me synim nxitjen e investimeve në teknologji inovative dhe zhvillimin e ekonomisë qarkulluese.

Përmes programit Wood2Value, ndërmarrjet e këtij sektori do të kenë mundësi të investojnë në zgjidhje që reduktojnë mbetjet, përmirësojnë përdorimin e burimeve natyrore dhe rrisin konkurrueshmërinë e tyre në treg.

Zyra e Bashkimit Evropian në Tiranë bëri të ditur se kompanitë e përzgjedhura do të mund të përfitojnë bashkëfinancim deri në 50% të kostove të pranueshme të investimit, me një mbështetje maksimale prej 100 mijë eurosh për projekt.

Sipas BE-së, skema financohet nga Bashkimi Evropian dhe Gjermania dhe synon të promovojë ekonominë qarkulluese në industrinë e përpunimit të drurit, duke nxitur përdorimin më efikas të lëndës së parë dhe uljen e mbetjeve gjatë procesit të prodhimit.

Në kuadër të këtij programi është hapur edhe thirrja për aplikime. Kompanitë e interesuara mund të dorëzojnë projekt-propozimet e tyre deri më 14 gusht 2026.