Parlamenti gjerman ka miratuar një reformë të rëndësishme të shërbimeve të inteligjencës, duke u dhënë agjencive të sigurisë kompetenca më të gjera për të përballuar kërcënimet e brendshme dhe të jashtme, përfshirë mundësinë e operacioneve të sabotimit jashtë territorit gjerman.
Projektligji u miratua me 309 vota pro, 190 kundër dhe 71 abstenime.
Ministri i Brendshëm, Alexander Dobrindt, e cilësoi paketën si “reformën e shekullit”, duke argumentuar se demokracia duhet të ketë instrumentet e nevojshme për t’u mbrojtur nga kërcënimet ndaj sigurisë kombëtare.
Kompetenca të reja për agjentët e inteligjencës
Reforma prek dy institucionet kryesore të inteligjencës gjermane: Shërbimin Federal të Inteligjencës (BND), përgjegjës për aktivitetet jashtë vendit, dhe Zyrën Federale për Mbrojtjen e Kushtetutës (BfV), që monitoron kërcënimet e brendshme.
Sipas ndryshimeve, BfV nuk do të kufizohet më vetëm në mbledhjen e informacioneve dhe mbikëqyrjen e personave të dyshuar.
Në rrethana të caktuara, agjentët do të mund të ndërmarrin veprime operative, përfshirë hyrjen e fshehtë në banesa private dhe ndërhyrjet në situata që lidhen me armë apo eksplozivë.
Megjithatë, kompetencat për arrestime dhe kontrolle të hapura do të mbeten ekskluzivisht në duart e policisë.
Ndërkohë, BND do të ketë më shumë mundësi për t’iu kundërpërgjigjur sulmeve kibernetike, përfshirë çaktivizimin e serverëve që përdoren nga grupe hakerash të mbështetura nga shtete të huaja.
Për disa prej ndërhyrjeve të parashikuara, një trupë e përbërë nga ish-gjyqtarë do të shqyrtojë paraprakisht ligjshmërinë e masave.
Rusia dhe Kina, në fokus të shqetësimeve të sigurisë
Qeveria gjermane e argumenton reformën me shtimin e aktiviteteve të inteligjencës së huaj, duke veçuar kërcënimet që, sipas saj, vijnë nga Rusia dhe Kina.
Një tjetër objektiv është forcimi i kapaciteteve kombëtare për mbledhjen dhe analizimin e informacionit, me synimin për të ulur varësinë e Gjermanisë nga të dhënat e siguruara prej aleatëve.
Opozita paralajmëron rrezik për liritë qytetare
Zgjerimi i kompetencave ka shkaktuar kundërshtime nga opozita dhe organizatat ligjore, të cilat paralajmërojnë për pasoja të mundshme ndaj privatësisë dhe të drejtave kushtetuese.
Shoqata Gjermane e Avokatëve ka ngritur shqetësimin se ndryshimet mund të cenojnë ndarjen institucionale mes shërbimeve të inteligjencës dhe policisë, si dhe mbrojtjen e komunikimeve konfidenciale mes avokatëve dhe klientëve.
Edhe deputeti i të Gjelbërve, Konstantin von Notz, ka kritikuar reformën, duke paralajmëruar se agjentët mund të fitojnë kompetenca ndërhyrjeje ndaj qytetarëve pa të njëjtin nivel transparence dhe kontrolli ligjor që zbatohet për policinë.
Ndarja mes inteligjencës dhe policisë ka një rëndësi të veçantë historike në Gjermani, për shkak të përvojës së vendit gjatë regjimit nazist, kur Gestapoja ndërthurte mbikëqyrjen me kompetencat policore për përndjekjen e kundërshtarëve politikë.
Reforma synon të forcojë aftësitë e shtetit gjerman për t’u përballur me kërcënimet moderne, por debati mbi balancën mes sigurisë kombëtare dhe mbrojtjes së lirive qytetare mbetet i hapur.
