Gjermanët po mendojnë gjithnjë e më shumë emigrimin, SHBA mbetet destinacioni më i preferuar
Gjithnjë e më shumë qytetarë gjermanë po marrin në konsideratë largimin nga vendi për të punuar jashtë, të nxitur nga dëshira për paga më të larta, një cilësi më të mirë jetese dhe një barrë më të ulët tatimore.
Sipas një sondazhi të realizuar nga platforma e punës Indeed, numri i kërkimeve për vende pune jashtë Gjermanisë është më shumë se dyfishuar që nga viti 2020, duke treguar një rritje të ndjeshme të interesit për emigrim.
Tendenca është veçanërisht e fortë tek personat me të ardhura të larta. Më shumë se gjysma (54%) e të anketuarve me të ardhura neto familjare mbi 6,000 euro në muaj deklaruan se gjatë 12 muajve të fundit kanë aplikuar për punë jashtë vendit ose kanë eksploruar tregun ndërkombëtar të punës.
Në total, rreth dy të tretat e pjesëmarrësve në sondazh thanë se po mendojnë të gjejnë një punë jashtë Gjermanisë. Rreth 30% kanë nisur tashmë kërkimet aktive ose kanë dërguar aplikime, ndërsa 77% e atyre që duan të largohen synojnë të jetojnë jashtë vendit për disa vite ose edhe përgjithmonë.
Sipas Indeed, profesionet më të kërkuara nga emigrantët potencialë janë ato në administratë dhe marketing, ndërsa interes të lartë ka edhe për sektorët e teknologjisë, mikpritjes dhe logjistikës.
Arsyeja kryesore që shtyn punonjësit të largohen janë pagat më të larta dhe një cilësi më e mirë jetese, të përmendura nga rreth 51% e të anketuarve.
Po ashtu, 42% shpresojnë të gjejnë një klimë më të favorshme ose një sistem me taksa dhe kontribute sociale më të ulëta, ndërsa vetëm 24% e konsiderojnë si motiv kryesor mundësinë për zhvillim më të mirë në karrierë.
Ekonomistja e tregut të punës në Indeed, Virginia Sodergeld, vlerëson se lëvizshmëria ndërkombëtare mund të jetë pozitive, pasi përvoja e fituar jashtë vendit mund të nxisë inovacionin dhe zhvillimin ekonomik.
Megjithatë, ajo paralajmëron se rezultatet e sondazhit tregojnë edhe një pakënaqësi të madhe me kushtet e jetesës dhe punës në Gjermani.
“Nëse dy të tretat e punonjësve po mendojnë të largohen, kjo duhet të shihet edhe si një sinjal pakënaqësie ndaj Gjermanisë si vend për të jetuar dhe punuar”, tha Sodergeld.
Një nga shqetësimet kryesore mbetet barra fiskale. Sipas të dhënave të sondazhit, 70% e të anketuarve besojnë se taksat dhe kontributet sociale në Gjermani janë shumë të larta në raport me të ardhurat dhe se përpjekja në punë nuk shpërblehet sa duhet.
Nga çdo 100 euro që një punëdhënës shpenzon për një punonjës mesatar, këtij të fundit i mbeten vetëm rreth 50.70 euro neto, ndërsa pjesa tjetër shkon për tatime dhe kontribute të sigurimeve shoqërore.
Sa i përket destinacioneve të preferuara, Shtetet e Bashkuara vazhdojnë të mbajnë vendin e parë me 14.4% të kërkimeve për punë jashtë vendit.
Në vendin e dytë renditen Mbretëria e Bashkuar dhe Zvicra, secila me nga 13.6%, ndërsa Emiratet e Bashkuara Arabe dhe India kanë shënuar një rritje të ndjeshme të interesit. Edhe Australia vijon të fitojë popullaritet, me një rritje prej 10% krahasuar me një vit më parë.
Ndërkohë, avantazhet kryesore që të anketuarit i atribuojnë Gjermanisë lidhen me sigurinë dhe stabilitetin. Rreth 60% vlerësojnë mjedisin social, 47% mbrojtjen e punësimit dhe rreth 35% sistemin e mirëqenies sociale.
Sipas Zyrës Federale të Statistikave (Destatis), gjatë vitit të kaluar rreth 97 mijë gjermanë më shumë emigruan sesa u kthyen në vend, duke shënuar humbjen neto më të madhe të popullsisë përmes emigrimit që nga viti 2017.
