Mbi 160 mijë persona pritet të marrin pjesë sot në demonstratat e planifikuara në 34 qytete të Gjermanisë nga lëvizja rinore “Gen Z regelt”, raporton Reuters.
Protestuesit kërkojnë më shumë investime në arsim, masa për uljen e kostos së jetesës dhe kundërshtojnë rikthimin e shërbimit të detyrueshëm ushtarak.
Tubimet janë parashikuar në Berlin, Hamburg, Këln, Frankfurt, Mynih dhe qytete të tjera. Organizatorët thonë se shqetësimet e brezit të ri po shpërfillen dhe kërkojnë financim më të madh për shkollat, universitetet dhe shërbimet publike.
Autoritetet po monitorojnë rrezikun e përfshirjes së grupeve ekstremiste. Megjithatë, Ministria e Brendshme ka deklaruar se deri tani nuk ka të dhëna konkrete për thirrje për dhunë apo përgatitje trazirash.
Organizatorët janë distancuar nga dhuna dhe kanë theksuar karakterin paqësor të demonstratave.
Në Berlin, disa biznese kanë vendosur mbrojtëse në vitrina ose kanë planifikuar mbylljen më herët, si masë parandaluese ndaj incidenteve të mundshme.
Mobilizimi zhvillohet ndërsa protestat e të rinjve janë përhapur në disa vende evropiane, të nxitura nga çmimet e larta, pasiguria për të ardhmen dhe pakënaqësia ndaj politikave qeveritare.
