Ministri i Jashtëm i Estonisë, Margus Tsahkna, u ka bërë thirrje vendeve evropiane që të mos i përshkruajnë më veprimet e Rusisë si “sulme hibride”, por t’i trajtojnë ato si akte sabotazhi dhe sulme të drejtpërdrejta kundër Evropës.
Në një intervistë për POLITICO, Tsahkna tha se incidentet e fundit të lidhura me shërbimet ruse janë pjesë e një fushate sistematike që, sipas tij, përbën “një lloj lufte” kundër vendeve evropiane.
Deklaratat vijnë pas njoftimit të autoriteteve estoneze se shërbimet speciale ruse qëndronin pas një sulmi me zjarr ndaj një ndërtese të kompanisë së mbrojtjes Milrem Robotics në Tallinn gjatë muajit gusht.
Ministria e Jashtme estoneze bëri të ditur më 29 shtator se, bazuar në informacionet e mbledhura nga shërbimet e sigurisë, sulmi ishte një akt sabotazhi i porositur nga Federata Ruse. Milrem Robotics prodhon mjete tokësore pa pilot dhe furnizon edhe Ukrainën.
Sipas Tsahkna, Rusia po përdor operacione të tilla për të krijuar frikë, për të thelluar ndarjet mes vendeve evropiane dhe për të dobësuar mbështetjen për Ukrainën.
Ai kërkoi që qeveritë evropiane të bashkëpunojnë më ngushtë në mbledhjen dhe shkëmbimin e provave, në mënyrë që sulmet të mund t’i atribuohen publikisht Rusisë dhe autorët e tyre të përballen me pasoja të rënda.
“Mesazhi është se nëse bashkëpunoni me shërbimet sekrete ruse, do të kapeni dhe do të përfundoni në burg”, deklaroi ministri estonez.
Tsahkna argumentoi se shumë prej personave të rekrutuar për sulme me dronë apo zjarrvënie nuk motivohen domosdoshmërisht nga ideologjia, por nga pagesat që u ofrohen.
Ai paralajmëroi se mungesa e një reagimi të koordinuar evropian mund të inkurajojë Moskën të ndërmarrë operacione edhe më serioze në të ardhmen.
Sipas tij, Rusia aktualisht nuk është në gjendje të ndërmarrë një sulm ushtarak në shkallë të gjerë kundër NATO-s, por kjo nuk do të thotë se një rrezik i tillë mund të përjashtohet në të ardhmen.
“Duhet ta përdorim këtë kohë për t’u përgatitur”, tha Tsahkna, duke kërkuar koordinim më të madh mes shërbimeve të inteligjencës dhe sigurisë së vendeve evropiane.
Estonia e ka cilësuar sulmin ndaj Milrem Robotics si pjesë të një fushate më të gjerë sabotazhi ruse kundër Evropës dhe ka thirrur për këtë çështje të ngarkuarin me punë të ambasadës ruse në Tallinn.
