Kancelari gjerman Friedrich Merz dhe partia e tij konservatore pësuan të dielën një tjetër humbje të rëndë përballë Alternativës për Gjermaninë (AfD) në zgjedhjet rajonale. Vetë Merz e cilësoi rezultatin si një “katastrofë”, por hodhi poshtë zërat se mund të largohet nga drejtimi i qeverisë dhe i CDU-së.
Në landin verilindor të Mecklenburg-Pomeranisë Perëndimore, AfD-ja fitoi rreth 38% të votave, duke regjistruar rezultatin e dytë më të mirë në historinë e saj. Partia Socialdemokrate (SPD) u rendit e dyta me rreth 35%, sipas rezultateve paraprake.
CDU-ja e kancelarit Merz mori vetëm 4.9% të votave, rezultati i saj më i dobët në zgjedhje rajonale ose kombëtare që prej përfundimit të Luftës së Dytë Botërore. Me këtë rezultat, partia rrezikon të mbetet jashtë parlamentit të landit, pasi nuk arriti pragun zgjedhor prej 5%.
“Rezultati në Mecklenburg-Pomeraninë Perëndimore nuk mund të zbukurohet. Është një katastrofë”, pranoi Merz pas mbylljes së qendrave të votimit.
Megjithatë, kancelari deklaroi se do të vazhdojë zbatimin e agjendës së reformave dhe se synon të mbetet një faktor stabiliteti në një periudhë të trazuar politike dhe ekonomike.
“Këto reforma janë kundërhelmi ndaj helmit të autoritarizmit. Ajo që duhet bërë tani kërkon kurajë, qëndrueshmëri dhe durim. Do t’i dëshmoj këto cilësi si kryetar i CDU-së dhe, mbi të gjitha, si kancelar i vendit tonë”, tha Merz.
Drejtuesit e AfD-së e cilësuan rezultatin si një fitore historike dhe shtuan presionin ndaj kancelarit. Bashkëkryetari Tino Chrupalla e quajti rezultatin një “sensacion”, ndërsa Alice Weidel kërkoi që CDU-ja të rishikojë si drejtimin e saj, ashtu edhe politikën e përjashtimit të çdo bashkëpunimi me të djathtën radikale.
“Friedrich Merz është kancelari i gabuar për CDU-në dhe po e tërheq partinë drejt fundit. CDU-ja duhet të pyesë veten nëse dëshiron të vazhdojë me këtë kancelar dhe me këto politika të majta”, deklaroi Weidel për televizionin publik gjerman.
Pavarësisht fitores, AfD-ja ka pak mundësi të marrë drejtimin e qeverisë së landit, pasi partitë e tjera refuzojnë të formojnë koalicion me të. Kryeministrja socialdemokrate Manuela Schwesig pritet të tentojë krijimin e një koalicioni të ri me partitë e majta.
CDU-ja pësoi rënie edhe në zgjedhjet rajonale në Berlin, ku u rendit e dyta me rreth 19% të votave. Partia e Majtë, Die Linke, doli në krye me 25.5% dhe mund të marrë drejtimin e kryeqytetit përmes një koalicioni me forcat e qendrës së majtë.
Dy rezultatet kanë shtuar diskutimet brenda CDU-së për të ardhmen politike të Merz, popullariteti i të cilit ndodhet në nivele shumë të ulëta. Megjithatë, drejtues të partisë kërkuan ndërprerjen e debatit për zëvendësimin e kancelarit dhe rikthimin e vëmendjes te çështjet politike.
Merz e ka lidhur mandatin e tij me një program reformash që synon të rrisë konkurrueshmërinë dhe të rikthejë rritjen ekonomike në Gjermani. Masat përfshijnë rritjen e moshës së pensionit, kufizimin e disa përfitimeve të sigurimit shëndetësor dhe shtrëngimin e rregullave për lejet mjekësore, propozime që kanë shkaktuar pakënaqësi te një pjesë e elektoratit.
