Enea Karakaçi inspekton investimet në Golem, dyfishohet kapaciteti i nënstacionit elektrik dhe forcohet furnizimi në zonat turistike

Ministri i Infrastrukturës dhe Energjisë, Enea Karakaçi, ka inspektuar investimet në nënstacionin elektrik të Golemit, pjesë e planit të masave për forcimin e furnizimit me energji në zonat turistike dhe bregdetare.

Sipas ministrit, nënstacioni i ri ka dyfishuar kapacitetin nga 31.5 në 80 megavat, duke krijuar një zgjidhje afatgjatë për furnizimin me energji për rreth 50 mijë banorë në zonën e Golemit dhe Malit të Robit.

Karakaçi theksoi se ky investim është pjesë e një programi më të gjerë të Operatorit të Sistemit të Shpërndarjes për vitin 2026, që synon modernizimin e infrastrukturës energjetike në të gjithë bregdetin shqiptar, në kushtet e rritjes së kërkesës gjatë sezonit turistik.

Nga ana e tij, drejtuesi i OSSH-së, Bendian Dalipi, bëri të ditur se nënstacioni i Golemit mbulon furnizimin e gjithë vijës bregdetare nga Golemi deri në Qerret dhe është një element kyç për përballimin e zhvillimit urban dhe rritjes së konsumit të energjisë në zonë.

Ai shtoi se paralelisht po vijojnë investimet në rrjet, përfshirë fuqizimin e nënstacionit të Porto Romanos, ku pritet të shtohet një transformator i dytë dhe kapaciteti të rritet nga 50 në 100 megavat.

Po ashtu, në zonën e plazhit të Golemit po realizohet zëvendësimi i rrjetit ekzistues 6 kV me kabina të reja 20 kV dhe linja të reja shpërndarjeje, me qëllim rritjen e sigurisë dhe cilësisë së furnizimit.

Ministri Karakaçi u shpreh se këto ndërhyrje janë të rëndësishme jo vetëm për uljen e humbjeve në rrjet, por edhe për garantimin e një furnizimi më të qëndrueshëm për banorët dhe bizneset, sidomos gjatë periudhës së pikut turistik.

Ai shtoi se investimet në rrjetin e tensionit të mesëm po shoqërohen edhe me ndërhyrje në rrjetin e tensionit të ulët, me synim minimizimin e defekteve dhe ndërprerjeve.

Sipas ministrit, edhe në zonën e Spillesë ka përfunduar faza e parë e investimeve, ndërsa pritet vijimi i punimeve për zgjidhjen e problematikave të mbetura.

“Të gjitha këto projekte janë pjesë e një plani të integruar që synon stabilizimin afatgjatë të furnizimit me energji në zonat bregdetare dhe mbështetjen e zhvillimit të turizmit,” u shpreh Karakaçi.

Nga ana tjetër, OSSH njoftoi se është duke u përmirësuar edhe menaxhimi i rrjetit në bashkëpunim me OST, ndërsa gjatë sezonit veror do të rritet edhe numri i personelit në terren për reagim më të shpejtë ndaj defekteve.

“Sezoni turistik këtë vit na gjen më të përgatitur dhe me kushte më të mira teknike dhe organizative,” deklaroi Dalipi.