Drejtori i Përgjithshëm i Doganave, Besmir Beja, njoftoi miratimin e udhëzimit të ri për vlerësimin doganor të mallrave, një dokument që synon unifikimin e praktikave, rritjen e transparencës dhe garantimin e trajtimit të barabartë për të gjithë operatorët ekonomikë.
Sipas Bejës, udhëzimi do të shërbejë si dokument praktik pune për strukturat doganore që merren me kontrollin dokumentar, analizën e riskut dhe vlerësimin doganor, duke standardizuar procedurat dhe metodologjinë e përdorur për përcaktimin e vlerës së mallrave.
Një nga risitë kryesore të aktit është forcimi i përdorimit të vlerës së transaksionit dhe të dhënave për mallrat identike ose të ngjashme, në përputhje me legjislacionin kombëtar dhe standardet e Organizatës Botërore të Doganave. Sipas tij, kjo do të reduktojë përdorimin e çmimeve të referencës dhe do të rrisë transparencën e procesit.
Për herë të parë, udhëzimi përcakton në mënyrë të detajuar hapat që ndiqen për secilën metodë të vlerësimit doganor, si dhe kalimin nga një metodë në tjetrën, me synim zbatimin e njëtrajtshëm të legjislacionit në të gjitha strukturat doganore.
Beja theksoi se dokumenti synon të garantojë mbledhjen e saktë të të ardhurave, trajtim të barabartë për bizneset, parandalimin e nënvlerësimeve dhe mbivlerësimeve, si dhe harmonizimin e praktikave shqiptare me standardet e Bashkimit Evropian.
“Miratimi i këtij dokumenti shënon një hap të rëndësishëm në modernizimin e administratës doganore dhe krijimin e një mjedisi më të parashikueshëm për biznesin”, deklaroi Beja.
