Britanikët janë pro Brexit. Ishte ky mesazhi i fortë i cili u përcoll herët në mëngjes në Bruksel. I menjëhershëm ishte reagimi i Presidenti të Këshillit Evropian, Charles Michel, i cili mbas urimit për fitoren i kujton Boris Johnson që Bashkimi Europian është gati për nisjen e fazës së dytë të Brexit. Tregtia, zhvillimi ekonomik, madje edhe siguria apo mbrojtja janë fusha për të cilat Presidenti i Këshillit Evropian thekson rëndësinë e bashkëpunimit me Mbretërinë e Bashkuar.
Fitorja e konservatorëve solli zhgënjim por edhe lehtësim sepse më në fund britanikët shprehën qartë qëndrimin e tyre në lidhje me Brexit. Ky lehtësim lexohet qartë në një postim të kryeministrit irlandez Leo Varadkar, i cili u shpreh se tashmë Johnson ka mundësinë për të vazhduar me hapin e rradhes, miratimin e Marrëveshjes.
Në deklaratat e tij të mëparashme, Boris Johnson e ka kundërshtuar zgjatjen e periudhës së tranzicionit post-Brexit përtej 2020, aspekt i cili është komentuar edhe nga minsitrat e Jashëm të BE-së për shkak se nuk lë shumë hapësirë për negocjuar një marrëveshje.
“Ne duhet të jemi realistë rreth afateve. Të bësh diçka në më pak se një vit është shumë sfiduese ” deklaroi Helen McEntee, Ministrja e Irlandës për çështjet e BE-së, për Financial Times.
Pavarësisht deklaratave, zhgënjimeve apo lehtësimeve ajo që është e qartë dhe emërues i përbashkët tek të gjithë aktorët e përfshirë është vendimi për të vijuar me Brexit.
Eunews.al
