Deputetët britanikë kanë rrëzuar projektligjin që synonte legalizimin e vdekjes së asistuar për të rriturit me sëmundje terminale në Angli dhe Uells.
Projektligji për të rriturit me sëmundje terminale nuk arriti të kalonte leximin e dytë në Dhomën e Komunëve. Në një votim të ngushtë, 286 deputetë votuan kundër dhe 270 në favor.
Nisma ishte paraqitur nga deputetja laburiste Lauren Edwards dhe parashikonte që personat mbi 18 vjeç të mund të kërkonin ndihmë për t’i dhënë fund jetës nëse vlerësoheshin nga dy mjekë se u kishin mbetur më pak se gjashtë muaj jetë.
Pas rrëzimit në Parlament, projektligji nuk do të vijojë më tej në procesin legjislativ.
Vendimi shënon një ndryshim të rëndësishëm krahasuar me qëndrimin e deputetëve ndaj një projektligji pothuajse të njëjtë, të paraqitur nga deputetja laburiste Kim Leadbeater.
Nisma e Leadbeater kishte siguruar mbështetjen e Dhomës së Komunëve në dy votime gjatë viteve 2024 dhe 2025, por nuk arriti të bëhej ligj pasi procesi mbeti pa kohën e nevojshme në Dhomën e Lordëve.
Votimi i së premtes pason rrëzimin në mars të një projektligji të ngjashëm nga Parlamenti skocez. Deputetët britanikë kishin votuar kundër legalizimit të vdekjes së asistuar edhe në vitin 2015.
Vdekja e asistuar vazhdon të jetë e paligjshme në Mbretërinë e Bashkuar. Në Angli, Uells dhe Irlandën e Veriut, ndihma ndaj një personi për t’i dhënë fund jetës mund të dënohet deri me 14 vjet burg.
Votimi u trajtua si çështje ndërgjegjeje, çka do të thotë se partitë nuk u dhanë deputetëve udhëzim zyrtar se si duhet të votonin. Secili ligjvënës ishte i lirë të vendoste sipas bindjes personale.
Kryeministri Andy Burnham, i cili nuk ishte deputet kur u diskutua projektligji i mëparshëm, zgjodhi të abstenonte për të mos ndikuar në qëndrimin e ligjvënësve.
Pas marrjes së detyrës, Burnham kishte argumentuar se përmirësimi i kujdesit paliativ dhe atij social duhet të paraprijë çdo vendim për legalizimin e vdekjes së asistuar.
“Është shumë e vështirë të zhvillohet ky debat në një situatë ku njerëzit nuk marrin kujdesin e nevojshëm dhe nuk kanë sigurinë se ky kujdes do t’u ofrohet”, deklaroi ai në korrik.
