Kosova ka afat deri në fund të dhjetorit për të përmbushur 27 hapa reformash në kuadër të Planit të Rritjes së Bashkimit Europian për Ballkanin Perëndimor. Përmbushja e këtyre detyrimeve lidhet me fonde që arrijnë në 165.8 milionë euro.
Sipas Zyrës së BE-së në Kosovë, autoritetet duhet të realizojnë reformat e përcaktuara dhe të raportojnë mbi përparimin e arritur, në mënyrë që të mund të përfitojnë mbështetjen financiare.
Në një përgjigje për gazetën “KOHA”, zëdhënësi i Zyrës së BE-së, Nikola Gaon, bëri të ditur se vlerësimi i reformave që kishin afat muajin qershor është ende në proces.
“Siç e dini, Kosova mund të përfitojë deri në 882.6 milionë euro, me kusht që të përmbushë reformat e përzgjedhura në kuadër të Agjendës së Reformave të miratuar, si dhe parakushtet dhe kushtet e përgjithshme”, deklaroi Gaon.
Ai sqaroi se disbursimi i fondeve nuk është automatik, por varet nga përmbushja e objektivave të përcaktuara dhe respektimi i kushteve të vendosura nga Bashkimi Europian.
Kosova ka përfituar vetëm parafinancimin
Në kuadër të Planit të Rritjes prej 6 miliardë eurosh për Ballkanin Perëndimor, Kosovës i janë vënë në dispozicion deri në 882.6 milionë euro.
Megjithatë, sipas raportimit të “KOHA”, vendi nuk ka marrë ende pagesa të rregullta të lidhura me realizimin e reformave.
Deri tani, Kosova ka përfituar vetëm 61.8 milionë euro parafinancim, të ndara në muajin prill.
Afati për shfrytëzimin e fondeve të Planit të Rritjes përfundon në verën e vitit 2027. Mosrealizimi i reformave brenda afateve të përcaktuara mund të sjellë humbjen e financimeve përkatëse.
BE kërkon stabilitet institucional
Bashkimi Europian ka theksuar gjithashtu rëndësinë e stabilitetit institucional në Kosovë për vijimin e reformave dhe përfitimin e mbështetjes financiare.
Sipas Zyrës së BE-së, funksionimi i qëndrueshëm i institucioneve është i nevojshëm që Kosova të shfrytëzojë plotësisht mundësitë që ofron Plani i Rritjes.
Muajt e mbetur deri në fund të vitit do të jenë të rëndësishëm për realizimin e reformave dhe për vlerësimin e përparimit nga institucionet europiane.
Përmbushja e 27 hapave do të përcaktojë nëse Kosova mund të avancojë drejt përfitimit të fondeve të lidhura me këtë fazë të Agjendës së Reformave.
