Pak minuta pas njoftimit të dorëheqjes së Keir Starmer, mediat britanike kanë nisur analizat mbi emrin që mund të marrë drejtimin e Partisë Laburiste dhe të qeverisë britanike. Sipas BBC-së, favoriti kryesor në këtë moment është Andy Burnham, një nga figurat më të njohura të laburistëve dhe ish-kryetar i Greater Manchester.

Korrespondenti politik i BBC-së, Nick Eardley, shkruan se brenda Partisë Laburiste po shtohen zërat që mbështesin një “kurorëzim” të Burnham, çka do të thotë se ai mund të bëhet lider pa pasur nevojë për një garë të fortë të brendshme.

Starmer ka bërë të ditur se procesi i nominimeve për pasardhësin e tij do të hapet pas dy javësh, duke lënë kohë për kandidatura të tjera të mundshme. Megjithatë, sipas vlerësimeve aktuale, shumica e deputetëve laburistë e konsiderojnë Burnham kandidatin më të fortë për të marrë drejtimin e partisë.

Një nga emrat që është përfolur si rival i mundshëm është Wes Streeting. Ai kishte deklaruar më herët se mund të kandidonte për drejtimin e partisë, por disa nga aleatët e tij kanë lënë të kuptohet se mund të tërhiqet nga gara. Në qarqet politike britanike po qarkullon gjithashtu ideja se Burnham mund t’i ofrojë Streeting një post të rëndësishëm në qeverinë e ardhshme, duke shmangur një përballje të drejtpërdrejtë.

Ndërkohë, disa figura të krahut të qendrës së djathtë të Partisë Laburiste po shqyrtojnë mundësinë e futjes në garë, por deri tani nuk ka sinjale të forta për një sfidë serioze ndaj Burnham.

Andy Burnham konsiderohet një nga politikanët më popullorë të Partisë Laburiste. I lindur në Aintree të Merseyside, ai ka deklaruar se u frymëzua të angazhohej në politikë nga greva e minatorëve në vitet ’80. Burnham ka qenë deputet nga viti 2001 deri në vitin 2017 dhe ka shërbyer në qeveritë e Tony Blair dhe Gordon Brown, duke fituar përvojë të gjerë në nivelet më të larta të politikës britanike.

Mes emrave të tjerë që përmenden si kandidatë të mundshëm është edhe Angela Rayner, ish-zëvendëskryeministre dhe një nga figurat më të njohura të krahut të majtë të partisë. Megjithatë, për momentin, shumica e analistëve politikë dhe deputetëve laburistë e shohin Burnham si kandidatin me më shumë gjasa për të marrë drejtimin e Partisë Laburiste dhe për t’u bërë kryeministri i ardhshëm i Britanisë së Madhe.