Kryeministri i ri britanik, Andy Burnham, ka kaluar 48 orët e para në detyrë duke formuar kabinetin e tij të ri, ku një pjesë e emrave më të spikatur janë ish-kritikë të paraardhësit të tij, Keir Starmer.

Sipas POLITICO, Burnham ka larguar nga postet kryesore disa prej aleatëve më të afërt të Starmer, vetëm pak ditë pasi premtoi se do t’i jepte fund përçarjeve brenda Partisë Laburiste.

Gjatë muajve të fundit të qeverisjes së tij, autoriteti i Starmer u dobësua gradualisht, ndërsa disa ministra dhanë dorëheqjen ose kërkuan publikisht largimin e tij.

Një nga përfituesit kryesorë të kabinetit të ri është lideri i Laburistëve në Skoci, Anas Sarwar. Ai ishte figura e parë e rëndësishme e partisë që kërkoi publikisht dorëheqjen e Starmer, duke argumentuar se skandalet që përfshinin kryeministrin ishin bërë një shpërqendrim për qeverinë.

Tashmë, Sarwar pritet të emërohet anëtar i Dhomës së Lordëve dhe ministër i Tregtisë në qeverinë e Burnham.

Ed Miliband është një tjetër emër që është promovuar. Ish-ministri i Sigurisë Energjetike dhe Objektivit “Net Zero” është emëruar ministër i Jashtëm. Sipas POLITICO, Miliband ishte ndër ministrat e parë të kabinetit që i sugjeroi Starmer të shqyrtonte dorëheqjen pas rezultateve të dobëta në zgjedhjet vendore të muajit maj.

Edhe John Healey rikthehet në qeveri me një post më të rëndësishëm. Pas dorëheqjes si ministër i Mbrojtjes në qershor, për shkak të mosmarrëveshjeve për financimin e ushtrisë, ai është emëruar kancelar i Thesarit, duke marrë drejtimin e financave publike.

Në letrën e dorëheqjes, Healey kishte akuzuar Starmer se nuk ishte në gjendje të siguronte burimet e nevojshme për mbrojtjen e vendit.

Një tjetër figurë e promovuar është Wes Streeting. Ai dha dorëheqjen si ministër i Shëndetësisë duke kritikuar mungesën e vizionit të qeverisë Starmer dhe më pas mbështeti kandidaturën e Burnham për drejtimin e Partisë Laburiste. Në kabinetin e ri ai është emëruar ministër i Mbrojtjes.

Ndërkohë, Louise Haigh konsiderohet një nga arkitektet kryesore të ngjitjes së Burnham në krye të qeverisë. Ajo kishte dhënë dorëheqjen më herët nga posti i ministres së Transportit pas zbulimit të një dënimi për mashtrim më shumë se një dekadë më parë, ndërsa më pas udhëhoqi një revoltë të deputetëve laburistë kundër reformave sociale të qeverisë Starmer.

Haigh ka deklaruar se kishte punuar prej një viti për ardhjen e Burnham në krye të qeverisë. Tashmë ajo është emëruar ministre e Zyrës së Kabinetit dhe Sekretare e Parë e Shtetit, duke u bërë një nga bashkëpunëtoret më të afërta të kryeministrit të ri.

Emërimet e para të Burnham sinjalizojnë një ndryshim të dukshëm në drejtimin politik të qeverisë laburiste, me figura që dikur sfiduan autoritetin e Keir Starmer duke marrë tani postet më të rëndësishme në kabinetin e ri.