Zëvendëspresidenti i Shteteve të Bashkuara, JD Vance, ka bërë të ditur se pritet të udhëtojë drejt Zvicrës brenda pak ditësh për të marrë pjesë në bisedimet me Iranin lidhur me programin bërthamor të Teheranit.

Në një intervistë për Fox News, Vance deklaroi se nisja e tij mund të ndodhë shumë shpejt, por theksoi se organizimi i takimeve diplomatike kërkon koordinim të kujdesshëm mes palëve të përfshira.

“Pres të nisem diku gjatë dy ditëve të ardhshme, por gjithmonë bëhet fjalë për një koordinim të ndjeshëm dhe protokollet diplomatike”, u shpreh ai.

Deklarata vjen në një moment kur po intensifikohen përpjekjet diplomatike për rifillimin e negociatave mes Uashingtonit dhe Teheranit, pas armëpushimit të arritur së fundmi mes Izraelit dhe Hezbollahut.

Zvicra pritet të shërbejë si një nga qendrat kryesore të kontakteve diplomatike, ndërsa Katari vazhdon të luajë rol ndërmjetësues mes dy vendeve.

Bisedimet synojnë nisjen e një procesi negociator për çështjet bërthamore, heqjen graduale të sanksioneve dhe sigurinë e lundrimit në Ngushticën e Hormuzit, një nga korridoret më të rëndësishme energjetike në botë.

Megjithatë, ende nuk është konfirmuar një datë zyrtare për fillimin e raundit të ri të negociatave, pasi zhvillimet e fundit në Liban dhe tensionet e vazhdueshme në rajon kanë ndikuar në axhendën diplomatike të palëve.