Kryeministri Edi Rama ka vijuar komentet lidhur me debatin për investimin në Zvërnec, duke iu referuar flamingove, simbolit që është përdorur gjerësisht nga protestuesit kundër projektit.

Gjatë fjalës së mbajtur në aktivitetin për 35-vjetorin e Partia Socialiste e Shqipërisë në Shkodër, Rama kundërshtoi akuzat se qeveria po dëmton mjedisin dhe zonat e mbrojtura.

“Mbrojnë Shqipërinë nga unë dhe ju? Mbrojnë natyrën nga unë dhe Partia Socialiste? Ne kemi me vete një histori më shumë se 10-vjeçare të luftës për të mbrojtur natyrën nga ata që ishin rreziku më i madh i saj. Ne nuk jemi shkatërrimtarët, por shpëtimtarët”, deklaroi kryeministri.

Duke iu referuar flamingove, Rama tha se këto shpendë do të kishin një histori tjetër për të treguar nëse do të mund të flisnin.

“Po të kishin gojë të flisnin flamingot që këta po i dalin për zot, do tregonin historinë e tyre të hidhur. Ata janë shtegtarë. Do tregonin historinë se si ata nuk vinin në Shqipëri sepse i pengonte pushka e atyre që bënin stërvitje dhe vrisnin zogj”, u shpreh ai.

Rama komentoi gjithashtu retorikën e përdorur në debatet publike për projektin, duke paralajmëruar kundër gjuhës përçarëse dhe etiketimit të kundërshtarëve si “tradhtarë”.

Sipas tij, qeveria ka investuar gjatë viteve të fundit në mbrojtjen e natyrës dhe biodiversitetit, ndërsa kundërshtoi pretendimet se zhvillimi i projektit në Zvërnec përbën kërcënim për mjedisin.

Deklaratat e kryeministrit vijnë në një kohë kur protestat kundër investimit në zonën e Zvërnecit vijojnë prej ditësh, ndërsa flamingot dhe Laguna e Nartës janë kthyer në simbol të debatit mes qeverisë dhe aktivistëve mjedisorë.