Polonia siguron kredi 44 miliardë euro nga BE për mbrojtjen, mes debatesh politike
Polonia ka nënshkruar një marrëveshje për përfitimin e një kredie shumë miliardë euro nga Bashkimi Evropian, e destinuar për forcimin dhe modernizimin e kapaciteteve mbrojtëse të vendit.
Dokumenti u firmos nga ministri i Mbrojtjes Władysław Kosiniak-Kamysz dhe ministri i Financave Andrzej Domański, duke parashikuar disbursimin e rreth 44 miliardë eurove për ushtrinë polake.
Kryeministri Donald Tusk e cilësoi marrëveshjen si një pikë kthese historike, duke theksuar se ajo do të rrisë ndjeshëm sigurinë e vendit në një periudhë sfiduese për Evropën.
Nga ana tjetër, komisioneri evropian për Mbrojtjen Andrius Kubilius deklaroi se Polonia po merr një rol kyç në mbrojtjen e kufirit lindor të kontinentit dhe në forcimin e sigurisë evropiane.
Marrëveshja është pjesë e programit SAFE (Security Action for Europe), përmes të cilit Bashkimi Evropian ka vënë në dispozicion 150 miliardë euro kredi me interesa të ulëta për vendet anëtare, me qëllim rritjen e kapaciteteve të tyre mbrojtëse. Polonia konsiderohet përfituesja më e madhe e këtij programi.
Megjithatë, procesi u shoqërua me tensione të forta politike brenda vendit. Presidenti euroskeptik Karol Nawrocki kishte vendosur veto ndaj ligjit që autorizonte përdorimin e fondeve, por qeveria arriti ta anashkalojë këtë pengesë përmes një rezolute që i lejoi ministrat të firmosin marrëveshjen për programin SAFE.
