Ahmetaj në Bruksel: Ekonomia shqiptare e qëndrueshme përballë sfidave globale

Zëvendësguvernatorja e Banka e Shqipërisë, Natasha Ahmetaj, mori pjesë në “Dialogun vjetor Ekonomik dhe Financiar midis BE-së dhe partnerëve rajonalë”, i zhvilluar në Bruksel, në kuadër të takimit të Këshillit ECOFIN.

Në këtë takim të nivelit të lartë, të organizuar nga Presidenca e Këshillit të Bashkimi Evropian, morën pjesë përfaqësues të institucioneve evropiane dhe vendeve partnere të rajonit.

Ahmetaj vlerësoi se zhvillimet gjeopolitike dhe konfliktet ndërkombëtare mbeten një burim i rëndësishëm rreziku për ekonomitë e hapura, për shkak të ndikimit që ato kanë në çmimet e energjisë dhe pritjet inflacioniste.

Ajo theksoi se ekonomia shqiptare paraqitet me tregues të qëndrueshëm makroekonomikë, duke veçuar inflacionin e kontrolluar dhe stabilitetin e sistemit bankar si elementë kyç për përballimin e goditjeve të jashtme.

Zëvendësguvernatorja nënvizoi gjithashtu rëndësinë e politikave ekonomike fleksibël dhe të bashkëpunimit ndërkombëtar për forcimin e stabilitetit financiar dhe reduktimin e pasigurive në tregje.

Në përfundim, ajo e cilësoi këtë dialog si një platformë të rëndësishme për thellimin e bashkëpunimit mes Bashkimit Evropian dhe partnerëve rajonalë, në funksion të garantimit të stabilitetit ekonomik dhe financiar.