Ministri i Financave, Petrit Malaj, prezantoi në Komisionin për Ekonominë, Punësimin dhe Financat projektbuxhetin e vitit 2027, i cili parashikon 907,9 miliardë lekë të ardhura dhe 976,1 miliardë lekë shpenzime. Shpenzimet rriten me 69,3 miliardë lekë krahasuar me planin e rishikuar të vitit 2026, ndërsa ndër përparësitë janë pensionet, shëndetësia, arsimi dhe investimet në infrastrukturë.
Të ardhurat e parashikuara, rreth 9,4 miliardë euro, përbëjnë 30,9% të Prodhimit të Brendshëm Bruto. Sipas Malajt, parashikimi mbështetet te rritja ekonomike, ndikimi i inflacionit, masat e paketës fiskale dhe zbatimi i Strategjisë Afatmesme të të Ardhurave.
Nga tatimet dhe doganat priten 583,5 miliardë lekë, ose 46,8 miliardë lekë më shumë se niveli i pritshëm për vitin 2026. Të ardhurat nga kontributet shoqërore dhe shëndetësore parashikohen në 210,3 miliardë lekë, me rritje prej 4,5%.
TVSH-ja pritet të sjellë 275,4 miliardë lekë, 10,2% më shumë se në vitin 2026. Paketa fiskale parashikon që nga 1 janari 2027 pragu i regjistrimit për TVSH-në të ulet nga 10 milionë në 5 milionë lekë. Tatimi mbi të ardhurat personale pritet të sjellë 107,4 miliardë lekë, rreth 10 miliardë më shumë se në vitin 2026, ndërsa të ardhurat nga tatimi mbi fitimin parashikohen në 62,1 miliardë lekë. Nga akcizat priten 80,6 miliardë lekë, të mbështetura kryesisht nga kalendari i rritjes së akcizës për produktet e duhanit.
Shpenzimet e përgjithshme parashikohen në 33,3% të PBB-së. Për personelin janë planifikuar 148,5 miliardë lekë, përfshirë 3,7 miliardë lekë për politikat e reja të pagave në sektorët prioritarë. Nga 89,2 miliardë lekët për shpenzime operative dhe mirëmbajtje, 12,9 miliardë janë parashikuar për arsimin e lartë, 7,9 miliardë për teknologjinë e informacionit dhe sigurinë kibernetike, 5,3 miliardë për mbështetjen e fermerëve dhe zhvillimin rural, si dhe 3,6 miliardë për mirëmbajtjen e rrjetit rrugor kombëtar.
Për fondet speciale janë parashikuar 313,9 miliardë lekë, ndërsa financimi i Skemës së Sigurimeve Shoqërore arrin në 215,6 miliardë lekë. Projektbuxheti parashikon rreth 4 miliardë lekë për indeksimin dhe politikat e reja të pensioneve, si dhe 20 miliardë lekë për bonusin mujor të pensionistëve. Në fund të vitit 2027 pritet të ketë rreth 805 mijë pensionistë, ndërsa sistemi i sigurimeve shoqërore pritet të mbështesë në total rreth 850 mijë përfitues.
Për ndihmën ekonomike dhe pagesat për personat me aftësi të kufizuara janë planifikuar 27,2 miliardë lekë. Gjatë vitit 2027 parashikohet të nisë skema e re e bonusit të bebes, me pagesa mujore për fëmijët deri në moshën pesëvjeçare. Një fond prej 870 milionë lekësh është parashikuar për gratë e papuna me tre ose më shumë fëmijë, kur të paktën njëri prej tyre është nën pesë vjeç.
Skema e Sigurimeve të Kujdesit Shëndetësor parashikohet të financohet me 70,8 miliardë lekë. Fondi pritet të mbulojë rreth 7,4 milionë vizita në kujdesin parësor dhe rimbursimin e barnave për rreth 400 mijë pacientë. Projektbuxheti parashikon gjithashtu zgjerimin e mbështetjes për pacientët me diabet dhe financimin e paketave të kardiologjisë, onkologjisë, dializës dhe fertilitetit.
Investimet publike janë planifikuar në 200,3 miliardë lekë, përfshirë 14,1 miliardë lekë financime të pritshme nga Plani i Rritjes i Bashkimit Europian për Ballkanin Perëndimor. Ndër projektet kryesore janë aksi Elbasan–Lekaj, bypass-i i Elbasanit, zgjerimi i autostradës Tiranë–Durrës dhe linjat hekurudhore Tiranë–Rinas–Durrës e Vorë–Hani i Hotit.
Në arsim janë planifikuar 5,6 miliardë lekë investime. Projektbuxheti parashikon gjithashtu tekste falas për 215 mijë nxënës, transport falas për 38 mijë nxënës dhe 17 mijë mësues, si dhe bursa për rreth 4 mijë nxënës nga familjet në nevojë.
Malaj tha se projektbuxheti synon të ruajë stabilitetin makroekonomik, të ulë gradualisht borxhin publik dhe të mbështesë zhvillimin ekonomik e procesin e integrimit europian të Shqipërisë.
