Rritja e pagave të negociuara në eurozonë pritet të përshpejtohet lehtë gjatë nëntë muajve të parë të vitit 2027, krahasuar me mesataren e vitit 2026. Vlerësimi bazohet në të dhënat e përditësuara të instrumentit të Bankës Qendrore Europiane për ndjekjen e marrëveshjeve kolektive të pagave.
Treguesi kryesor, i cili i shpërndan pagesat e njëhershme përgjatë një periudhe 12-mujore, parashikon një rritje prej 2,3% për të gjithë vitin 2026. Kjo përllogaritje mbështetet në marrëveshje që mbulojnë 46,2% të punonjësve.
Për gjysmën e dytë të vitit 2026, treguesi qëndron në 2,7%, ndërsa për gjysmën e parë të vitit 2027 arrin në 2,8%. Në tremujorin e tretë të vitit të ardhshëm parashikohet të ulet në 2,4%, bazuar në marrëveshjet e disponueshme deri tani.
Sipas BQE-së, vlerat relativisht të ulëta në fillim të vitit 2026 lidhen me efektin statistikor të daljes graduale nga përllogaritjet të pagesave të njëhershme të vitit 2024, të cilat nuk janë përsëritur. Ndikimi i tyre pritet të zbehet në gjysmën e dytë të këtij viti.
Krahasuar me publikimin e shtatorit, treguesi kryesor është rishikuar në rritje me mesatarisht rreth 0,1 pikë përqindjeje, si për gjysmën e dytë të vitit 2026, ashtu edhe për gjysmën e parë të vitit 2027.
Duke përjashtuar pagesat e njëhershme, rritja strukturore e pagave të negociuara parashikohet të jetë mesatarisht 2,8% gjatë tre tremujorëve të parë të vitit 2027, kundrejt 2,6% për të gjithë vitin 2026.
Ndërkohë, treguesi që i regjistron pagesat e njëhershme pa i shpërndarë në kohë qëndron në 2,7% për vitin 2026 dhe për gjysmën e parë të vitit 2027. Për tremujorin e tretë të vitit të ardhshëm, ai zbret në 2,4%.
BQE-ja thekson se vlerësimet për periudhat e ardhshme mbështeten në një mbulim më të kufizuar të punonjësve. Nga 46,2% në vitin 2026, mbulimi bie në 31,8% për gjysmën e parë të vitit 2027 dhe në 23,3% për tremujorin e tretë. Për këtë arsye, të dhënat mund të ndryshojnë me nënshkrimin e marrëveshjeve të reja kolektive.
Instrumenti është zhvilluar nga BQE-ja në bashkëpunim me nëntë banka qendrore kombëtare. Ai përdoret për të vlerësuar ecurinë e kostove të punës dhe presionet inflacioniste në eurozonë.
