Dy kompani të mëdha kineze kanë ndërprerë bashkëpunimin me Kylian Mbappé, pas përhapjes së një videoje ku sulmuesi francez duket se tallet me Mao Ce Dunin, themeluesin e Kinës moderne.
Në videon e shpërndarë gjerësisht në rrjetin social X, Mbappé pyetet për memen më qesharake që ka parë me veten. Ai përmend një imazh ku fytyra e tij ishte montuar mbi portretin e Maos.
“Ishte një tip, mendoj se është një diktator kinez”, shprehet futbollisti.
Prodhuesi i pijeve Dongpeng dhe gjiganti i bulmetit Mengniu njoftuan të martën përfundimin e marrëveshjeve me lojtarin e Realit të Madridit. Asnjëra kompani nuk e përmendi drejtpërdrejt videon si arsyen e vendimit.
“Kompania jonë kundërshton fuqimisht dhe ndjek një politikë të tolerancës zero ndaj çdo sjelljeje që fyen ndjenjat kombëtare”, deklaroi Dongpeng.
Mengniu njoftoi se po ndërpriste me efekt të menjëhershëm çdo bashkëpunim me Mbappén.
Polemika është shtrirë edhe te transmetimet sportive. Sipas medias kineze The Paper, transmetuesi shtetëror CCTV po pezullon transmetimin e ndeshjeve të La Ligës, kampionatit spanjoll ku aktivizohet sulmuesi francez.
Mbappé nuk kishte reaguar publikisht në momentin e raportimit.
Debati shpërtheu një ditë pasi anglezi Harry Kane e la pas Mbappén në garën për Topin e Artë.
