Kryeministri izraelit Benjamin Netanyahu ka publikuar në rrjetin social X një imazh të krijuar me inteligjencë artificiale, që paraqet një shpërthim atomik mbi Tel Aviv, duke paralajmëruar për rrezikun që, sipas tij, do të sillte pajisja e Iranit me armë bërthamore.
Postimi, i bërë dy ditë përpara zgjedhjeve parlamentare të 27 tetorit, ka nxitur reagime të ashpra nga opozita, e cila e akuzon kryeministrin se po përdor frikën për të ndikuar te votuesit.
“Nëse iranianët sigurojnë armë bërthamore, asgjë tjetër nuk do të ketë më rëndësi”, shkroi Netanyahu.
Kreu i qeverisë iu referua polemikave për çështjen “Qatargate” dhe debatit mbi shmangien e shërbimit ushtarak nga një pjesë e komunitetit ultraortodoks, duke argumentuar se këto çështje po largojnë vëmendjen nga kërcënimi iranian.
“Nëse dy bomba atomike do të binin në Izraelin qendror, kush do të shqetësohej për të gjitha këto polemika të parëndësishme?”, shtoi ai.
Netanyahu e paraqiti presidencën e Donald Trumpit në Shtetet e Bashkuara si një mundësi historike për t’u përballur me Iranin. Sipas tij, mosshfrytëzimi i këtij momenti do të kishte pasoja që brezat e ardhshëm nuk do t’ua falnin udhëheqësve izraelitë.
Në mesazh, ai pretendoi gjithashtu se zgjedhja e një udhëheqësi të paaftë për t’u përballur me Teheranin mund t’i ekspozonte familjet izraelite ndaj “rrezikut të një Holokausti të dytë”.
Kundërshtarët politikë e kanë akuzuar Netanyahun se mund të kërkojë rifillimin e luftës kundër Iranit për përfitime elektorale ose për të shtyrë zgjedhjet. Kryeministri i ka mohuar këto pretendime.
Ndërkohë, sipas raportimeve, shefi i Shtabit të Përgjithshëm të ushtrisë izraelite, gjenerallejtënant Eyal Zamir, ka thënë në një takim privat se nuk sheh nevojë operacionale për të goditur Iranin përpara votimit.
Gadi Eisenkot, kryetar i partisë Yashar, e akuzoi kryeministrin se po përdor alarmimin e publikut si taktikë elektorale.
“Netanyahu, je histerik. Si në çdo fushatë zgjedhore, po përdor sërish të njëjtat taktika: gënjeshtra dhe frikësim”, shkroi ai në X.
Eisenkot pretendoi se paralajmërimet vijnë pas dështimit të kryeministrit për të arritur objektivat e luftës kundër Iranit.
“Ke dështuar. Dhe pas dy ditësh, populli i Izraelit do ta tregojë këtë në kutitë e votimit”, deklaroi ai.
Edhe Yair Golan, kreu i partisë Demokratët, kritikoi publikimin e imazhit, duke vënë në pikëpyetje gjykimin e kryeministrit në komunikimin e çështjeve të sigurisë kombëtare.
“Përditësim: Kryeministri i Izraelit ka publikuar një imazh të një bombe atomike mbi Tel Aviv”, shkroi Golan.
Ai i kërkoi Netanyahut të qëndrojë larg rrjeteve sociale dhe tha se votimi i së martës u jep qytetarëve mundësinë të zëvendësojnë drejtuesit që, sipas tij, po përhapin panik.
