Ministri i Drejtësisë, Toni Gogu, ka zhvilluar një takim me Komisionerin Europian për Demokracinë, Drejtësinë, Shtetin e së Drejtës dhe Mbrojtjen e Konsumatorit, Michael McGrath, ku në qendër të diskutimeve ishte forcimi i shtetit të së drejtës dhe përparimi i Shqipërisë drejt anëtarësimit në Bashkimin Europian.
“Në fokus ishin konsolidimi i reformës në drejtësi dhe qëndrueshmëria e saj, si dhe përmbushja e kritereve të integrimit europian dhe roli i Ministrisë së Drejtësisë në këto procese”, shkroi Gogu.
Ministri theksoi se angazhimi i institucioneve shqiptare mbetet forcimi i një sistemi drejtësie më efektiv dhe garantimi i mbrojtjes së të drejtave të qytetarëve.
“Angazhimi ynë mbetet një drejtësi më efektive, institucione që funksionojnë dhe garanci më të forta për të drejtat e qytetarit”, u shpreh ai.
Takimi zhvillohet në kuadër të vizitës së Komisionerit Europian Michael McGrath në Shqipëri, gjatë së cilës ai është takuar edhe me kryeministrin Edi Rama.
Pas takimit me kreun e qeverisë, McGrath vlerësoi përparimin e Shqipërisë në procesin e anëtarësimit, duke e cilësuar vendin si një nga kandidatët pararendës.
Megjithatë, komisioneri theksoi se mbetet ende punë për t’u bërë dhe se ruajtja e ritmit të reformave është e domosdoshme për arritjen e rezultateve të qëndrueshme dhe të pakthyeshme.
Reforma në drejtësi dhe forcimi i shtetit të së drejtës mbeten ndër elementet kryesore të procesit të negociatave të Shqipërisë me Bashkimin Europian.
