Qytetarët e Zvicrës po votojnë sot në një referendum të rëndësishëm që mund të sjellë ndryshime të mëdha në politikat e emigracionit dhe në menaxhimin e rritjes së popullsisë.

Nisma është paraqitur nga Partia Popullore Zvicerane (SVP), forca më e madhe politike në vend, e cila kërkon vendosjen e një kufiri maksimal për popullsinë dhe masa më të forta për frenimin e emigracionit. Sipas propozimit, popullsia e Zvicrës nuk duhet të kalojë 10 milionë banorë deri në vitin 2050.

Aktualisht, Zvicra ka rreth 9.1 milionë banorë. Nëse referendumi miratohet, kufizime të reja për azilkërkuesit dhe ribashkimin familjar do të hyjnë në fuqi sapo popullsia të arrijë në 9.5 milionë banorë, prag që pritet të arrihet gjatë viteve të ardhshme.

Propozimi parashikon gjithashtu që, në rast se masat e reja nuk arrijnë të frenojnë rritjen e popullsisë, autoritetet zvicerane mund të shqyrtojnë rinegocimin ose edhe ndërprerjen e marrëveshjes së lëvizjes së lirë me Bashkimin Evropian.

Pjesa më e madhe e qytetarëve kanë votuar me postë, ndërsa qendrat e votimit do të qëndrojnë të hapura vetëm për disa orë gjatë ditës. Rezultatet e para pritet të publikohen pasditen e sotme.

Sondazhet e fundit tregojnë një garë më të ngushtë sesa parashikohej fillimisht, duke e bërë rezultatin e referendumit të pasigurt dhe me rëndësi të madhe për të ardhmen e politikave migratore të vendit.