Zelensky: Kina paralajmëroi Rusinë të mos përdorë armë bërthamore kundër Ukrainës
Presidenti ukrainas Volodymyr Zelensky deklaroi se Kina i ka dërguar një paralajmërim Rusisë kundër përdorimit të armëve bërthamore si përgjigje ndaj sulmeve ukrainase në territorin rus.
Duke folur për gazetarët të enjten, Zelensky tha se Pekini ka reaguar në mënyrë të drejtpërdrejtë ndaj diskutimeve që kanë qarkulluar në mediat ruse për një përgjigje të mundshme bërthamore.
“Mendoj se i keni dëgjuar këto zëra në mediat ruse: ‘Po sikur t’u përgjigjemi sulmeve ukrainase me armë bërthamore?’ Më duket se kjo ishte hera e parë që Kina reagoi drejtpërdrejt, në një formë pothuajse ultimative, duke bërë të qartë se nuk duhet të ketë asnjë mendim për përdorimin e armëve bërthamore”, tha Zelensky.
Sipas presidentit ukrainas, ai është informuar për ndërhyrjen e Pekinit nga liderë evropianë gjatë samitit të NATO-s në Ankara, ku është diskutuar edhe roli i Kinës në përfundimin e luftës në Ukrainë.
Zelensky shtoi se këtë çështje e ka diskutuar edhe me presidentin amerikan Donald Trump, por nuk pranoi të zbulojë detaje nga biseda e tyre.
Rusia zhvilloi stërvitje ushtarake me armë bërthamore në Bjellorusi gjatë muajit maj, megjithatë presidenti Vladimir Putin deri më tani ka shmangur kërcënimet e drejtpërdrejta për përdorimin e arsenalit bërthamor kundër Ukrainës.
Edhe pse disa politikanë rusë kanë kërkuar një reagim më të ashpër, Putin ka deklaruar se sulmet ukrainase nuk kanë shkaktuar dëme të mjaftueshme për të justifikuar përdorimin e armëve bërthamore.
Muajin e kaluar, deputeti i Shën Petersburgut, Viktor Perov, u bëri thirrje ligjvënësve rusë t’i kërkojnë presidentit Putin përdorimin e armëve bërthamore kundër Ukrainës.
“Presidenti ynë u detyrua të nisë operacionin special ushtarak, por fatkeqësisht gjithçka nuk shkoi sipas planit. Prandaj besoj se deputetët duhet t’i drejtohen presidentit me një kërkesë për të filluar përdorimin e armëve bërthamore, gjë që do ta detyronte udhëheqjen ukrainase të nënshkruante një marrëveshje paqeje”, deklaroi Perov.
