Izraeli ka ndarë me Shtetet e Bashkuara informacione të reja të inteligjencës, të cilat sipas autoriteteve izraelite tregojnë se Irani po përgatit një plan të ri për të vrarë presidentin amerikan Donald Trump, raportoi The Wall Street Journal, duke cituar burime të njohura me çështjen.

Nëse konfirmohet, zhvillimi do të shënonte një përshkallëzim të mëtejshëm të tensioneve mes Uashingtonit dhe Teheranit.

Irani prej vitesh ka deklaruar publikisht se synon të hakmerret ndaj Trump për urdhrin që çoi në vrasjen e gjeneralit Qassem Soleimani, komandant i lartë i Trupave të Gardës Revolucionare Islamike, gjatë mandatit të parë të presidentit amerikan.

Shtëpia e Bardhë nuk komentoi drejtpërdrejt raportin, por iu referua deklaratave që Trump bëri të mërkurën gjatë samitit të NATO-s në Ankara.

“Ata duan ta eliminojnë udhëheqësin e SHBA-së, mua”, tha Trump para gazetarëve.

“Unë jam në çdo listë. E pashë këtë mëngjes, jam në secilën prej listave të tyre. Dhe deri më tani, mendoj se kam qenë pak me fat, por kjo ndoshta nuk zgjat shumë”, shtoi ai.

Raporti vjen në një moment kur marrëdhëniet mes Trump dhe kryeministrit izraelit Benjamin Netanyahu janë ftohur për shkak të qasjeve të ndryshme ndaj konfliktit me Iranin.

Sipas Wall Street Journal, Netanyahu ka mbështetur vazhdimin e operacioneve ushtarake kundër Iranit dhe zgjerimin e objektivave të luftës, ndërsa Trump ka kërkuar një rrugëdalje diplomatike, duke paralajmëruar se konflikti mund të dëmtojë ekonominë globale. Muajin e kaluar, SHBA ndërmjetësuan një armëpushim të brishtë me Iranin.

Megjithatë, zyra e kryeministrit izraelit bëri të ditur se Trump dhe Netanyahu zhvilluan një bisedë telefonike të enjten, ku ranë dakord të vazhdojnë koordinimin mes dy vendeve. Sipas deklaratës, presidenti amerikan informoi Netanyahun edhe mbi aktivitetet e fundit ushtarake të SHBA-së në Gjirin Persik.

Raporti përmend gjithashtu se gjatë funeralit të udhëheqësit suprem iranian Ali Khamenei, pjesëmarrësit brohoritën thirrje kundër Trump dhe shpalosën një banderolë me mbishkrimin: “Ne do ta vrasim Trumpin.”

Sipas gazetës amerikane, në fazat e para të konfliktit me Iranin, Trump dhe Netanyahu komunikonin shpesh, me kryeministrin izraelit që ndante informacione të inteligjencës dhe objektiva ushtarake në telefonata të zhvilluara deri në orët e vona të natës. Megjithatë, burimet thonë se bisedat e fundit mes tyre kanë qenë më të tensionuara, duke reflektuar dallimet në strategjinë ndaj Iranit.