Bashkëkryetarja e partisë gjermane të ekstremit të djathtë Alternativa për Gjermaninë (AfD), Alice Weidel, bëri thirrje për negociata paqeje mes Rusisë dhe Ukrainës, ndërsa argumentoi se industria gjermane ka nevojë për gaz dhe naftë të lirë nga Rusia për të mbetur konkurruese.
Gjatë një vizite të mërkurën në Parlamentin Evropian në Strasburg, Weidel tha se bisedimet duhet të marrin në konsideratë interesat e të dyja vendeve.
“Nuk bëhet fjalë për kapitullim ndaj Rusisë, absolutisht jo. Por duam që palët të ulen në tryezë. Është koha që ta bëjnë këtë me një qasje të arsyeshme diplomatike, duke marrë parasysh interesat e Ukrainës dhe të Rusisë”, deklaroi ajo.
Deklaratat erdhën gjatë prezantimit të programit të AfD-së për Bashkimin Evropian, në një aktivitet të organizuar nga grupi i ekstremit të djathtë “Evropa e Kombeve Sovrane”.
E pyetur nga eurodeputeti polak Tobiasz Bocheński për shqetësimet e Polonisë ndaj Rusisë, Weidel u përgjigj se partia e saj vendos në plan të parë interesat gjermane.
“Jemi në një fazë kritike, ku industria jonë po vdes pa gazin dhe naftën ruse”, pretendoi ajo.
Weidel argumentoi se Gjermania ka nevojë për burime energjie të qëndrueshme, të besueshme dhe të lira, duke pretenduar se Rusia i kishte garantuar ato për katër dekada. Sipas saj, sanksionet ndaj Moskës kanë “shkatërruar” modelin ekonomik gjerman.
Industria gjermane po përballet me shkurtime vendesh pune, në kushtet e kostove të larta të energjisë, konkurrencës kineze dhe tarifave amerikane. Ndërkohë, kancelari Friedrich Merz po kërkon reforma për të nxitur ekonominë.
Gjatë prezantimit, Weidel parashtroi edhe planet e AfD-së për kufizimin e kompetencave të institucioneve evropiane. Partia kërkon zvogëlimin e Komisionit Evropian dhe zëvendësimin e Parlamentit Evropian të zgjedhur drejtpërdrejt me një asamble delegatësh të caktuar nga parlamentet kombëtare.
AfD-ja synon gjithashtu të kërkojë përjashtime për Gjermaninë nga politikat e BE-së që nuk arrin t’i ndryshojë sipas qëndrimeve të saj. Sipas Weidelit, kjo mund të përfshijë edhe daljen nga zona Schengen.
Duke komentuar përpjekjet diplomatike për Ukrainën, ajo kritikoi mungesën e Evropës në tryezën e negociatave dhe tha se BE-ja duhej të kishte kërkuar paqen që në fillim të luftës.
Vendet evropiane po diskutojnë mënyrën e përfaqësimit të tyre në bisedime. Udhëheqësit e BE-së kanë theksuar vazhdimisht se çdo marrëveshje duhet të përfshijë Ukrainën dhe të ofrojë garanci sigurie për të.
Weidel konfirmoi gjithashtu se AfD-ja po zhvillon bisedime me Tubimin Kombëtar të Francës për marrëdhëniet mes tyre. Partia franceze i ndërpreu lidhjet me AfD-në në vitin 2024, për shkak të shqetësimeve mbi ekstremizmin dhe qëndrimet e saj ndaj Rusisë.
“Duhet të punojmë së bashku në nivel evropian dhe, për këtë arsye, duhet të jemi në bisedime”, tha ajo.
