Trump deklaron mbi 1 miliard dollarë të ardhura, kriptomonedhat burimi kryesor i fitimeve
Presidenti i SHBA-së, Donald Trump, ka deklaruar mbi 1 miliard dollarë të ardhura gjatë vitit 2025, ku pjesa më e madhe e fitimeve vjen nga bizneset e lidhura me kriptomonedhat, sipas raportit të tij të detyrueshëm financiar prej 927 faqesh.
Sipas dokumentit, Trump raportoi 635 milionë dollarë të ardhura nga monedha meme me emrin e tij, e lançuar pak ditë para rikthimit në Shtëpinë e Bardhë, megjithëse vlera e saj në treg ka rënë ndjeshëm.
Raporti tregon gjithashtu fitime të konsiderueshme nga bizneset e pasurive të paluajtshme. Trump përfitoi rreth 122 milionë dollarë nga resorti i golfit në Doral të Floridës, 77 milionë dollarë nga Mar-a-Lago dhe mbi 30 milionë dollarë nga secili prej klubeve të golfit në Bedminster (New Jersey), Jupiter (Florida) dhe Turnberry (Skoci).
Presidenti raportoi gjithashtu të ardhura nga produktet me markën “Trump”, përfshirë orët, Biblat, atletet, aromat dhe kitarat, ku vetëm shitja e orëve i solli 4.7 milionë dollarë.
Edhe Zonja e Parë, Melania Trump, deklaroi të ardhurat e saj për vitin 2025. Ajo përfitoi 10.7 milionë dollarë nga një marrëveshje licence për dokumentarin kushtuar jetës së saj, si dhe 6 milionë dollarë nga shitja e NFT-ve.
Në deklaratë përfshihen edhe miliona dollarë të ardhura nga marrëveshje ligjore, mes tyre 24.5 milionë dollarë nga Meta, 22 milionë dollarë nga YouTube, 16 milionë dollarë nga ABC, 16 milionë dollarë nga CBS dhe 8 milionë dollarë nga platforma X.
Shtëpia e Bardhë mohoi se presidenti po përfiton nga posti i tij, duke theksuar se bizneset e Trump administrohen nga fëmijët e tij dhe se nuk ekziston konflikt interesi. Zëvendëssekretarja e shtypit, Anna Kelly, deklaroi se të gjitha vendimet e administratës merren në interes të qytetarëve amerikanë.
Pas rikthimit në Shtëpinë e Bardhë, Trump ka ndjekur një qasje më mbështetëse ndaj industrisë së kriptomonedhave, ndërsa administrata e tij ka zbutur qasjen rregullatore ndaj këtij sektori.
Sipas revistës Forbes, pasuria e Trump vlerësohet aktualisht në rreth 6 miliardë dollarë, ndërsa Bloomberg Billionaires Index e llogarit atë në 7.6 miliardë dollarë.
