Aleksandar Vuçiç dyshohet se kishte shqyrtuar mundësinë e kundërshtimit me forcë të rezultatit të zgjedhjeve parlamentare në Serbi, por u tërhoq pas presionit diplomatik evropian. Kështu raporton gazeta britanike The Times, duke iu referuar politikanëve dhe një ish-drejtuesi të lartë të policisë serbe.
Pretendimet lidhen me zhvillimet e 25 tetorit, kur Lista Studentore siguroi një fitore të thellë. Ato nuk janë konfirmuar në mënyrë të pavarur dhe janë kundërshtuar nga zëdhënësja e Vuçiçit.
Spasoje Vuleviç, ish-komandant i Njësisë Speciale Kundër Terrorizmit, tha për gazetën se mijëra policë dhe persona të lidhur me pushtetin ishin vendosur në qendër të Beogradit. Sipas tij, kjo lëvizje synonte mbrojtjen e pushtetit të Vuçiçit.
“Jam 100% i sigurt se ai kishte planifikuar të mos i njihte rezultatet”, deklaroi Vuleviç.
Eurodeputeti Sandro Gozi tha gjithashtu se gjatë ditës së zgjedhjeve kishte marrë informacione shqetësuese nga burime diplomatike për mundësinë e kundërshtimit të rezultatit me forcë.
Ndërsa Radomir Saiçiç, kandidat i Listës Studentore, pretendoi se ekzistonte një plan për përdorimin e dhunës nëse rezultati do të ishte i ngushtë. Sipas tij, kontakte nga persona të lidhur me policinë dhe institucione të tjera ndikuan në ndryshimin e qëndrimit të Vuçiçit.
Grumbullimet në qendër të Beogradit
Sipas The Times, gjatë ditës së votimit, grupe burrash të veshur me të zeza u panë duke shkuar drejt parkut Pionirski, ku prej muajsh ishte ngritur një kamp me çadra nga mbështetësit e Vuçiçit.
Në zonë u pozicionuan edhe forca të xhandarmërisë, disa rrugë u bllokuan dhe në disa pjesë u fik ndriçimi publik.
Avokati Rade Gjuriç, i lidhur me Shoqatën e Pavarur të Gazetarëve të Serbisë, ngriti dyshimin se mund të ishte përgatitur një skenar për të pretenduar parregullsi, për të kërkuar përsëritjen e votimit dhe për të nxitur protesta që do të shërbenin si justifikim për anulimin e rezultatit.
Megjithatë, rreth orës 21:30, një orë e gjysmë pas mbylljes së vendvotimeve, Vuçiç pranoi humbjen. Sipas gazetës, grupet e mbledhura në qendër të kryeqytetit më pas u larguan.
Presioni diplomatik dhe reagimi i Vuçiçit
Burimet e cituara nga gazeta sugjerojnë se telefonatat dhe presioni nga përfaqësues evropianë mund të kenë ndikuar në vendimin për pranimin e rezultatit. Identiteti i personave që mund ta kenë kontaktuar Vuçiçin dhe përmbajtja e bisedave nuk janë konfirmuar në mënyrë të pavarur.
Zëdhënësja e tij i hodhi poshtë pretendimet se vendosja e policisë lidhej me një plan për të ruajtur pushtetin me forcë. Sipas saj, masat e sigurisë kishin për qëllim parandalimin e dhunës nga protestuesit.
