Sot nis Botërori 2026, turneu më i madh në historinë e futbollit me 48 kombëtare dhe 104 ndeshje

Kupa e Botës 2026 ngre sot siparin në Meksikë, duke shënuar fillimin e edicionit më të madh në historinë e futbollit botëror. Për herë të parë, turneu organizohet nga tre vende njëkohësisht – Shtetet e Bashkuara, Kanadaja dhe Meksika – dhe do të zhvillohet me një format të zgjeruar prej 48 kombëtaresh.

Ndeshja hapëse do të luhet në stadiumin legjendar “Azteca” në Meksiko Siti, ku përfaqësuesja e Meksikës do të përballet me Afrikën e Jugut në takimin e parë të Grupit A.

Me këtë ndeshje, “Azteca” hyn në histori si stadiumi i parë që pret ndeshje të Kupës së Botës në tre edicione të ndryshme, duke konfirmuar statusin e tij si një nga arenat më ikonike të futbollit.

Për të reflektuar karakterin unik të këtij Botërori, FIFA ka vendosur të organizojë tre ceremoni hapëse të veçanta, nga një në secilin prej vendeve organizatore. Ceremonia e parë zhvillohet sot në Meksikë, ndërsa më pas aktivitete festive do të mbahen edhe në Toronto dhe Los Anxheles përpara ndeshjeve të para të Kanadasë dhe SHBA-së.

Botërori 2026 do të zgjasë deri më 19 korrik dhe do të përfshijë gjithsej 104 ndeshje, duke vendosur një rekord të ri në historinë e kompeticionit. Takimet do të zhvillohen në 16 qytete të ndryshme të Amerikës së Veriut.

Ky edicion sjell edhe ndryshime të rëndësishme në rregullore. FIFA synon të reduktojë humbjen e kohës gjatë lojës dhe të rrisë efektivitetin e arbitrimit, përmes masave më të ashpra ndaj vonesave të qëllimshme dhe zgjerimit të rasteve kur mund të ndërhyjë sistemi VAR.

Argjentina e nis turneun si kampione në fuqi, ndërsa Brazili, Franca, Anglia, Gjermania dhe Spanja renditen mes favoritëve kryesorë për të ngritur trofeun më prestigjioz të futbollit botëror.

Interesi i tifozëve është i përqendruar edhe te disa prej emrave më të mëdhenj të futbollit ndërkombëtar, për të cilët ky mund të jetë Botërori i fundit në karrierë.

Me formatin e ri, pjesëmarrjen rekord të kombëtareve dhe organizimin në tre shtete, Botërori 2026 pritet të jetë një nga ngjarjet sportive më të ndjekura, më spektakolare dhe më fitimprurëse në historinë e futbollit.