Shqipëria dhe Franca thellojnë bashkëpunimin në drejtësi dhe luftën kundër krimit
Shqipëria dhe Franca po forcojnë bashkëpunimin në fushën e drejtësisë, me fokus në reformën në sistem, modernizimin e legjislacionit penal dhe luftën kundër krimit të organizuar.
Kjo u bë e ditur gjatë një deklarate të përbashkët për shtyp mes ministrit të Drejtësisë, Toni Gogu dhe homologut të tij francez, Gérald Darmanin, i cili ndodhet për vizitë zyrtare në Tiranë.
Ministri Gogu e cilësoi këtë vizitë si një moment të rëndësishëm për të reflektuar mbi progresin e bërë gjatë një dekade reforme në drejtësi, duke theksuar ndarjen e saj nga politika dhe forcimin e pavarësisë së institucioneve.
“Është puna e një shoqërie të tërë për të ristrukturuar drejtësinë dhe për ta çuar drejt standardeve europiane”, u shpreh ai.
Sipas tij, bashkëpunimi mes dy vendeve përfshin rishikimin e Kodit Penal dhe Kodit të Procedurës Penale, si dhe forcimin e kapaciteteve në sistemin e magjistraturës. Një rol të rëndësishëm në këtë proces luan partneriteti mes institucioneve të formimit të magjistratëve në të dy vendet.
Nga ana e tij, Darmanin vlerësoi reformat në Shqipëri si “jashtëzakonisht ambicioze dhe mbresëlënëse”, duke theksuar rëndësinë e shtetit të së drejtës për integrimin në Bashkimi Evropian.
“Jemi shumë të lumtur që t’ju mbështesim përmes ekspertëve, magjistratëve dhe profesorëve tanë në rishikimin e legjislacionit penal”, deklaroi ai, duke shtuar se Franca do të vijojë të jetë një partner aktiv në këtë proces.
Një tjetër fokus i rëndësishëm është lufta kundër krimit të organizuar, ku të dy vendet synojnë të thellojnë bashkëpunimin, veçanërisht në sekuestrimin dhe konfiskimin e aseteve kriminale. Sipas Darmanin, praktikat shqiptare në këtë drejtim mund të shërbejnë edhe si model për Francën.
Në deklaratë u theksua gjithashtu rëndësia e zgjerimit të bashkëpunimit në sistemin penitenciar dhe në shkëmbimin e informacionit dhe inteligjencës.
Vizita e ministrit francez vjen në një moment të rëndësishëm për Shqipërinë, në prag të Kongresi Botëror i Ligjit 2027, që do të mbahet në Tiranë, duke e vendosur vendin në fokus të dialogut ndërkombëtar për drejtësinë dhe shtetin e së drejtës.
